നാട്ടിലെ സ്മാര്‍ട്ട് ഫോണ്‍ വിപണിയില്‍ നടക്കുന്നത് അറിയാന്‍ നമ്മുക്കു ചുറ്റുമുള്ളവരുടെ കൈയ്യിലിരിക്കുന്ന ഫോണുകള്‍ ഒന്നു നിരീക്ഷിച്ചാല്‍ മതി. രാജ്യത്തെ സ്മാര്‍ട്ട് ഫോണ്‍ വിപണി രണ്ടായി പിരിഞ്ഞ്, വില കുറഞ്ഞ ഫോണുകള്‍ പിന്നിലേക്കു മാറുന്നത് കാണാം. കൂടിയ ഫോണുകള്‍ക്കാണ് ഡിമാന്‍ഡ്.
ഏപ്രില്‍ ജൂണ്‍ പാദത്തില്‍ ഇന്ത്യയിലെ സ്മാര്‍ട്ട് ഫോണ്‍ കയറ്റുമതി, വിതരണ കണക്കുകളില്‍ മുന്‍ വര്‍ഷത്തെ ഇതേ കാലയളവിനെ അപേക്ഷിച്ച് 10 ശതമാനം കുറവ് ഉണ്ടായിട്ടുണ്ട്. ആറു വര്‍ഷത്തിനിടെ ജൂണ്‍ പാദത്തില്‍ ഉണ്ടായിരിക്കുന്ന ഏറ്റവും വലിയ കുറവിന്റെ കാരണം 15,000 രൂപയില്‍ താഴെ വിലയുള്ള ഫോണുകളുടെ വില്‍പ്പന പകുതിയായി കുറഞ്ഞതാണ്. മറുവശത്ത് ഫോണുകളുടെ ശരാശരി വില്‍പ്പന വില 30,000 രൂപയിലേക്ക് ഉയരുകയും ചെയ്തു.
സംസ്‌കൃത വസ്തുക്കളുടെയും ഘടകങ്ങളുടെയും വിലവര്‍ധനയുടെ മുഴുവന്‍ ബാധ്യതയും ഉപഭോക്താവിലേക്ക് മാറ്റാന്‍ കമ്പനികള്‍ക്ക് കഴിയില്ല. അതിനാല്‍ തന്നെ, കുറഞ്ഞ ഫോണുകള്‍ വിപണിയിലേക്ക് എത്തിക്കുന്നതില്‍ നിര്‍മ്മാതാക്കളും പിന്നോട്ടാണ്.
കൂടുതല്‍ മികച്ച സ്‌ക്രീന്‍, വേഗത, കണക്റ്റിവിറ്റി തുടങ്ങിയ ചെറിയ മെച്ചപ്പെടുത്തലുകള്‍ മാത്രം കണ്ട് പുതിയ ഫോണ്‍ വാങ്ങാന്‍ ഉപഭോക്താക്കള്‍ ഇപ്പോള്‍ തയ്യാറാകുന്നില്ലെന്നും വിപണിയിലെ ട്രെന്‍ഡുകള്‍ വ്യക്തമാക്കുന്നുണ്ട്. മുമ്പ് 18 – 24 മാസത്തിലൊരിക്കല്‍ ഫോണ്‍ മാറ്റിയിരുന്നവര്‍ ഇപ്പോള്‍ കൂടുതല്‍ കാലം പഴയ ഫോണ്‍ തന്നെ ഉപയോഗിക്കുന്ന പ്രവണതയിലാമത്രേ.
ഇന്ത്യയില്‍ സ്മാര്‍ട്ട്‌ഫോണ്‍ വിപണി വലിയതോതില്‍ വളരുകയോ നമ്മള്‍ വാങ്ങുന്നത് കുറയ്ക്കുകയോ ചെയ്തിട്ടില്ല. മികച്ച ഫോണിലേക്ക് മാറാനുള്ള ഉപഭോക്താക്കളുടെ ആഗ്രഹവും കുറഞ്ഞ ചെലവില്‍ ലഭിക്കുന്ന വായ്പാ സൗകര്യവും വില കൂടിയ ഫോണുകളുടെ വില്‍പ്പനയെ സഹായിക്കുന്നുവെന്നാണ് വ്യവസായ രംഗത്തെ വിദഗ്ധര്‍ പറയുന്നത്. റിസര്‍വ് ബാങ്കിന്റെ കണക്കനുസരിച്ച് വാഹന, ഭവന, ക്രെഡിറ്റ് കാര്‍ഡ് വായ്പകള്‍ ഒഴികെയുള്ള മറ്റ് ചില്ലറ വായ്പകള്‍ ജനുവരി മുതല്‍ ജൂണ്‍ വരെയുള്ള ഓരോ മാസവും മുന്‍വര്‍ഷത്തെ അപേക്ഷിച്ച് ഏകദേശം 23- 24 ശതമാനം വളര്‍ന്നിട്ടുണ്ട്.
പുതിയ സ്മാര്‍ട്ട്‌ഫോണുകളുടെ പ്രധാന വില്‍പ്പന ആകര്‍ഷണം എഐ ഫീച്ചറുകളായെങ്കിലും പ്രോസസര്‍, പെര്‍ഫോമന്‍സ്, ബാറ്ററി തുടങ്ങിയ അടിസ്ഥാന സവിശേഷതകള്‍ക്കാണ് ഉപഭോക്താക്കള്‍ കൂടുതല്‍ പ്രാധാന്യം നല്‍കുന്നതെന്നും പഠനം പറയുന്നു.
കൗണ്ടര്‍പോയിന്റ് റിസര്‍ച്ചിന്റെ കണക്കനുസരിച്ച്, 2026ലെ ആദ്യ പാദത്തില്‍ 29 ശതമാനം ഉപഭോക്താക്കള്‍ പ്രോസസറിനെയാണ് പുതിയ സ്മാര്‍ട്ട്‌ഫോണ്‍ തിരഞ്ഞെടുക്കുമ്പോഴുള്ള പ്രധാന ഘടകമായി പരിഗണിച്ചത്. ഒരു വര്‍ഷം മുമ്പ് ഇത് 24 ശതമാനമായിരുന്നു. ആമസോണ്‍ ഇന്ത്യ 40,000ലധികം പേരില്‍ നടത്തിയ സര്‍വേയില്‍ 82 ശതമാനം പേരുടെ വാങ്ങല്‍ തീരുമാനത്തെ എഐ ഫീച്ചറുകള്‍ സ്വാധീനിക്കുന്നതായി കണ്ടെത്തി. കോണ്‍ടെക്‌സ്ച്വല്‍ അസിസ്റ്റന്‍സാണ് ഏറ്റവും കൂടുതല്‍ ആവശ്യപ്പെട്ട എഐ സൗകര്യം. തുടര്‍ന്ന് എഐ ഫോട്ടോ എഡിറ്റിങ്ങും വിഷ്വല്‍ സെര്‍ച്ചും.
എന്നാല്‍ പെര്‍ഫോമന്‍സും വേഗതയും 87 ശതമാനം, ബാറ്ററി ലൈഫ് 79 ശതമാനം, ക്യാമറ ഗുണനിലവാരം 77 ശതമാനം ഉപഭോക്താക്കള്‍ക്ക് പ്രധാനമാണ്. ആപ്പിള്‍, സാംസങ്, ഗൂഗിള്‍, വണ്‍പ്ലസ്, ഓപ്പോ തുടങ്ങിയ കമ്പനികള്‍ പുതിയ മോഡലുകളില്‍ എഐ കൂടുതല്‍ ഉള്‍പ്പെടുത്തുമ്പോഴും, ഉപഭോക്താക്കളുടെ മുന്‍ഗണനയില്‍ അടിസ്ഥാന സൗകര്യങ്ങള്‍ ഇപ്പോഴും മുന്നിലാണ്.
Moving away from low-cost phones: A premium wave of change in the smartphone market.
