തിരുവനന്തപുരം | നിലമ്പൂര്‍ ഉപതെരഞ്ഞെടുപ്പില്‍ തൃണമൂല്‍ കോണ്‍ഗ്രസ് സ്ഥാനാര്‍ത്ഥിയായി പി.വി. അന്‍വര്‍ മത്സരിക്കും. തിങ്കളാഴ്ച നാമനിര്‍ദ്ദേശ പത്രിക സമര്‍പ്പിക്കും. പാര്‍ട്ടി ചിഹ്നത്തില്‍ മത്സരിക്കണമെന്നാണ് ദേശീയനേതൃത്വം അന്‍വറിനെ അറിയിച്ചിരിക്കുന്നത്. തൃണമുല്‍ കോണ്‍ഗ്രസ് അധ്യക്ഷയും പശ്ഛിമ ബംഗാള്‍ മുഖ്യമന്ത്രിയുമായ മമതാ ബാനര്‍ജിയുടെ ആശീര്‍വാദത്തോടെയാണ് അന്‍വര്‍ സ്ഥാനാര്‍ത്ഥി ആകുന്നതെന്ന് തൃണമുല്‍കോണ്‍ഗ്രസിന്റെ ഔദ്യോഗിക വാര്‍ത്താക്കുറിപ്പില്‍ പറയുന്നു.
‘ഇപ്പോള്‍ എന്റെ ജീവനും അപകടത്തിലാണ്. ഒരു വശത്ത് പിണറായിയും മറുവശത്ത് സതീശനും മറുവശത്ത് ആര്‍.എസ്.എസും ഉണ്ട്. എന്നെ തകര്‍ക്കാനുള്ള തീരുമാനവുമായി മൂവരും ഒന്നിച്ചിരിക്കുന്നു. ഒരുപക്ഷേ 2026 ലെ തിരഞ്ഞെടുപ്പ് വരെ ഞാന്‍ അതിജീവിക്കും. നിലമ്പൂരിലെ ജനങ്ങള്‍ എന്നെ ഉപേക്ഷിച്ചാല്‍, എനിക്ക് അതിജീവിക്കാന്‍ കഴിയുമെന്ന് ഞാന്‍ പ്രതീക്ഷിക്കുന്നില്ല. എന്റെ വിധി അങ്ങനെയാണെങ്കില്‍, അങ്ങനെയാകട്ടെ – എന്റെ തീരുമാനവും അതാണ്. മരണത്തെ ഞാന്‍ ഭയപ്പെടുന്നില്ല. നിലമ്പൂരിലെ പാവപ്പെട്ട ജനങ്ങള്‍ക്കായി ഞാന്‍ എന്റെ ജീവിതം സമര്‍പ്പിക്കുന്നു.
ജനങ്ങള്‍ക്കുവേണ്ടി എല്ലാ സ്ഥാനങ്ങളും പദവികളും ഞാന്‍ ഉപേക്ഷിച്ച് അവരില്‍ പൂര്‍ണ്ണ വിശ്വാസമര്‍പ്പിച്ചുകൊണ്ട് ഈ പോരാട്ടത്തിലേക്ക് ഇറങ്ങുന്നു. എനിക്ക് ആരും എന്നോടൊപ്പം നില്‍ക്കുന്നില്ല,’ അന്‍വര്‍ പറഞ്ഞു. ‘ഞാന്‍ സ്ഥാനാര്‍ത്ഥിയല്ല – നിലമ്പൂരിലെ ഓരോ വോട്ടും യഥാര്‍ത്ഥ സ്ഥാനാര്‍ത്ഥിയാണ്. ഈ തിരഞ്ഞെടുപ്പ് കേരളത്തിലെമ്പാടുമുള്ള ദരിദ്രര്‍ക്കും അടിച്ചമര്‍ത്തപ്പെട്ടവര്‍ക്കും വേണ്ടി സമര്‍പ്പിച്ചിരിക്കുന്നു’- പി.വി. അന്‍വര്‍ കൂട്ടിച്ചേര്‍ത്തു. ”കൂടെ ഉണ്ടാവണം. നിങ്ങളാണ് സ്ഥാനാര്‍ഥികള്‍” എന്നു തുടങ്ങുന്ന ഫെയ്സ്ബുക്ക് പോസ്റ്റിലൂടെയാണ് അന്‍വറിന്റെ വോട്ടഭ്യര്‍ത്ഥന. നിങ്ങളുടെ പ്രശ്നങ്ങളാണ് നമ്മള്‍ ചര്‍ച്ച ചെയ്യുന്നത്. ഞാന്‍ ഒരു പ്രതിനിധി മാത്രം. എന്നും അന്‍വര്‍ ഫെയ്സ്ബുക്കില്‍ കുറിച്ചു.
