തിരുവനന്തപുരം | നടന്‍ പൃഥ്വിരാജ് നല്ല സംവിധായകന്‍ അല്ലെന്നും എമ്പുരാന്‍ പോലെയുള്ള സിനിമകള്‍ കാണില്ലെന്നും ഒരു അഭിമുഖത്തില്‍ വച്ചുകാച്ചിയ സാമൂഹ്യനിരീക്ഷകന്‍ മൈത്രേയന്‍ മാപ്പുപറഞ്ഞു.
ഫേസ്ബുക്കിലൂടെയാണ് മൈത്രേയന്‍ പൃഥ്വിരാജിനോട് ഖേദം പ്രകടിപ്പിച്ചത്. താന്‍ അഭിമുഖത്തില്‍ പറഞ്ഞതൊക്കെയും നിഷേധിക്കാതെയാണ് വേദപ്രകടനം. പൃഥ്വിരാജ് ഒരു നല്ല സിനിമ പോലും എടുത്തതായി തനിക്കറിയില്ല എന്നാണ് മൈത്രേയന്‍ അഭിമുഖത്തില്‍ പറഞ്ഞത്. ഇത് സോഷ്യല്‍മീഡിയായില്‍ വലിയ ചര്‍ച്ചയായി മാറിയിരുന്നു. ഇതോടെയാണ് മൈത്രേയന്‍ നിരുപാധികം മാപ്പുപറഞ്ഞുകൊണ്ട് ഫെയ്‌സ്ബുക്കില്‍ കുറിപ്പിട്ടത്.
മൈത്രേയന്റെ കുറിപ്പിന്റെ പൂര്‍ണ്ണരൂപം
”ബഹുമാനപൂര്‍വ്വം പൃഥ്വിരാജിന്
മൂന്നു പേര്‍ എന്നെ അഭിമുഖ സംഭാഷണം ചെയ്യാന്‍ വന്നു എന്നുള്ള കാര്യം സത്യമാണ്. പല വിഷയങ്ങള്‍ സംസാരിച്ചിരുന്നതില്‍ സിനിമ, സംവിധാനം, അഭിനയം എന്നിവ കൂടി ചര്‍ച്ച ചെയ്തു എന്ന കാര്യവും സത്യമാണ്. താങ്കള്‍ സംവിധാനം ചെയ്ത സിനിമകളെപറ്റിയും സംസാരിച്ചിരുന്നു എന്നതും സത്യമാണ്. ഈ പോസ്റ്ററില്‍ ഉള്ളവരി ഞാന്‍ പറഞ്ഞതും സത്യമാണ്. പക്ഷേ, ഇത്തരം ഒരു പോസ്റ്റര്‍ ഇറക്കാനുള്ള ഉദ്ദേശത്തോടെയാണ് അവര്‍ ആ ചോദ്യങ്ങള്‍ ചോദിച്ചതെന്ന കാര്യം അറിയില്ലായിരുന്നു. താങ്കളെ അടിക്കാന്‍ പാകത്തിലൊരു വടിയായി ഞാന്‍ മാറിയതില്‍ ഖേദിക്കുന്നു. നിരുപാധികം മാപ്പ് ചോദിക്കുന്നു. നിങ്ങളുടെ സിനിമ ഞാന്‍ കാണുന്നതായിരിക്കും.”
