ഇസ്ലാമാബാദ് | ജൂണ്‍ അവസാനം മണ്‍സൂണ്‍ ആരംഭിച്ചതിനുശേഷം പാകിസ്ഥാനില്‍ 200 ലധികം പേര്‍ക്ക് ജീവന്‍ നഷ്ടപ്പെട്ടതായി പാകിസ്ഥാന്റെ ദേശീയ ദുരന്ത നിവാരണ അതോറിറ്റി (എന്‍ഡിഎംഎ) റിപ്പോര്‍ട്ട്. മരിച്ചവരില്‍ 100 ഓളം കുട്ടികളും ഉള്‍പ്പെടുന്നു. പാക് പഞ്ചാബിലാണ് ഏറ്റവും കൂടുതല്‍ പേര്‍ മരിച്ചത് – 123 പേര്‍, തുടര്‍ന്ന് ഖൈബര്‍ പഖ്തുന്‍ഖ്വയില്‍ 40 പേര്‍, സിന്ധില്‍ 21 പേര്‍, ബലൂചിസ്ഥാനില്‍ 16 പേര്‍, ഇസ്ലാമാബാദിലും പാകിസ്ഥാന്‍ അധിനിവേശ ജമ്മു കശ്മീരിലും ഒരാള്‍ വീതം. വീടുകള്‍ തകര്‍ന്നതിനെ തുടര്‍ന്നാണ് കുറഞ്ഞത് 118 പേര്‍ മരിച്ചത്. പെട്ടെന്നുള്ള വെള്ളപ്പൊക്കത്തില്‍ 30 പേര്‍ മരിച്ചു. മുങ്ങിമരണം, ഇടിമിന്നല്‍, വൈദ്യുതാഘാതം, മണ്ണിടിച്ചില്‍ എന്നിവ മൂലമാണ് മറ്റുള്ളവര്‍ മരിച്ചത്. 182 കുട്ടികള്‍ ഉള്‍പ്പെടെ 560 ലധികം പേര്‍ക്ക് പരിക്കേറ്റതായും റിപ്പോര്‍ട്ടില്‍ പറയുന്നു.
റാവല്‍പിണ്ടിയില്‍, വീടുകളിലും തെരുവുകളിലും മാര്‍ക്കറ്റുകളിലും വെള്ളപ്പൊക്കം പടര്‍ന്നു, മുഴുവന്‍ അയല്‍പക്കങ്ങളും വെള്ളത്തിനടിയിലായി. ജലനിരപ്പ് അപകടകരമാംവിധം ഉയര്‍ന്നു. ഫൈസലാബാദിലും കനത്ത നാശമാണ്. രണ്ട് ദിവസത്തിനുള്ളില്‍ 33 സംഭവങ്ങളിലായി 11 പേര്‍ മരിക്കുകയും 60 പേര്‍ക്ക് പരിക്കേല്‍ക്കുകയും ചെയ്തു. ചക്വാളില്‍ മാത്രം, 450 മില്ലിമീറ്ററിലധികം മഴയെത്തുടര്‍ന്ന് 32 ലധികം റോഡുകള്‍ ഒലിച്ചുപോയി. നിരവധി പ്രദേശങ്ങളില്‍ വൈദ്യുതി വിതരണം ഇതുവരെ പുനഃസ്ഥാപിച്ചിട്ടില്ല.
