തിരുവനന്തപുരം | മുതിര്‍ന്ന കോണ്‍ഗ്രസ് നേതാവും മുന്‍ കെപിസിസി പ്രസിഡന്റുമായ തെന്നല ബാലകൃഷ്ണപിള്ള (95) അന്തരിച്ചു. തിരുവനന്തപുരം അനന്തപുരി ആശുപത്രിയില്‍ ചികിത്സയിലിരിക്കെ ഇന്ന് (വെള്ളി) രാവിലെയാണ് അന്തരിച്ചത്. മൃതദേഹം രാവിലെ 10.30 നും പിന്നീട് കെപിസിസി ഓഫീസിലും പൊതുദര്‍ശനത്തിന് വയ്ക്കും. ശവസംസ്‌കാരം നാളെ (ശനി) ഉച്ചയ്ക്ക് ഒരു മണിക്ക് നടക്കും.
കെപിസിസി പ്രസിഡന്റായി രണ്ടുതവണ സേവനമനുഷ്ഠിച്ചിട്ടുണ്ട്. അടൂര്‍ നിയോജകമണ്ഡലത്തില്‍ നിന്ന് രണ്ടുതവണ എംഎല്‍എയായി. മൂന്ന് തവണ രാജ്യസഭാംഗം കൂടിയായിരുന്നു. കോണ്‍ഗ്രസ് പാര്‍ട്ടിക്കുള്ളിലെ വിവിധ പ്രാദേശിക തല ഉത്തരവാദിത്തങ്ങള്‍ വഹിച്ച അദ്ദേഹം പദവികളിലൂടെ ഉയര്‍ന്നുവന്ന് ഡിസിസിയിലും കെപിസിസിയിലും സേവനമനുഷ്ഠിച്ചു. അഞ്ച് വര്‍ഷത്തിലേറെ കൊല്ലം ഡിസിസി പ്രസിഡന്റായിരുന്നു. 1977 ലും 1982 ലും അടൂരില്‍ നിന്ന് എംഎല്‍എയായി തിരഞ്ഞെടുക്കപ്പെട്ടു. 1998 ല്‍ വയലാര്‍ രവിയുടെ പിന്‍ഗാമിയായി തെന്നല ബാലകൃഷ്ണപിള്ള ആദ്യമായി കെപിസിസി പ്രസിഡന്റായി. 2001 വരെ ആ പദവി വഹിച്ചു. 2004 മുതല്‍ 2005 വരെ അദ്ദേഹം രണ്ടാം തവണയും സേവനമനുഷ്ഠിച്ചു. 1991, 1992, 2003 വര്‍ഷങ്ങളിലാണ് കേരളത്തില്‍ നിന്ന് രാജ്യസഭയിലേക്ക് തിരഞ്ഞെടുക്കപ്പെട്ടത്.
