നൈജീരിയ | ഒരു സംഘം അക്രമികള്‍ ഇരച്ചുകയറി നടത്തിയ അക്രമത്തില്‍ നൂറിലധികംപേര്‍ കൂട്ടക്കൊല ചെയ്യപ്പെട്ടതായി റിപ്പോര്‍ട്ടുകള്‍. വടക്കന്‍-മധ്യ നൈജീരിയയിലെ ബെനു സ്റ്റേറ്റിലാണ് ആക്രമണം നടന്നത്. കുമ തദ്ദേശ സ്വയംഭരണ പ്രദേശത്തെ യെലെവാട്ട സമൂഹത്തില്‍ രാത്രി വൈകി ക്രിമിനലുകളായ ആയുധധാരികള്‍ അതിക്രമിച്ചു കയറിയാണ് ആക്രമണം നടത്തിയത്.
സായുധരായ കന്നുകാലി മേയ്ക്കുന്നവരാണ് ആക്രമണം നടത്തിയതെന്ന് ദൃക്സാക്ഷികള്‍ പറഞ്ഞു. ഭൂമി, ജല ലഭ്യത, കുടിയേറ്റം, കന്നുകാലി നാശനഷ്ടങ്ങള്‍ എന്നിവയെച്ചൊല്ലിയുള്ള തര്‍ക്കങ്ങള്‍ കാരണം നൈജീരിയയിലെ കര്‍ഷക സമൂഹങ്ങളും ഇടയന്മാരും തമ്മിലുള്ള ദീര്‍ഘകാല സംഘര്‍ഷമാണ് ആക്രമണത്തിന് കാരണം.
”സായുധരായ ആളുകള്‍ ഞങ്ങളുടെ ഷെല്‍ട്ടറുകള്‍ക്ക് തീയിടുന്നതിന് മുമ്പ് പെട്രോള്‍ ഒഴിച്ചു, ഉറക്കത്തില്‍ ഞങ്ങളുടെ ആളുകളെ ചുട്ടുകളഞ്ഞു.” – ഗ്രാമവാസികള്‍ പറഞ്ഞു. ആക്രമണം രണ്ട് മണിക്കൂറിലധികം നീണ്ടുനിന്നുവെന്നും വീടുകള്‍ നശിപ്പിക്കപ്പെട്ടുവെന്നും കുടുംബങ്ങള്‍ കത്തുന്ന കെട്ടിടങ്ങള്‍ക്കുള്ളില്‍ കുടുങ്ങിയെന്നും താമസക്കാര്‍ പറഞ്ഞു.102 മൃതദേഹങ്ങള്‍ കണ്ടെടുത്തതായും ബെനു സംസ്ഥാന ഗവര്‍ണറുടെ സുരക്ഷാ, ആഭ്യന്തര കാര്യങ്ങളുടെ പ്രത്യേക ഉപദേഷ്ടാവായ ജോസഫ് ഹാര്‍ സ്ഥിരീകരിച്ചു. പ്രദേശത്ത് തന്ത്രപരമായ യൂണിറ്റുകള്‍ വിന്യസിച്ചിട്ടുണ്ടെന്ന് ബെനു സംസ്ഥാന പോലീസ് വക്താവ് ഉദേമെ എഡെറ്റ് പറഞ്ഞു.
ഡസന്‍ കണക്കിന് ആളുകളെ ഇപ്പോഴും കാണാനില്ലെന്നും നൂറുകണക്കിന് പേര്‍ക്ക് പരിക്കേറ്റതായും പലര്‍ക്കും വൈദ്യസഹായം ലഭ്യമല്ലെന്നും ആംനസ്റ്റി റിപ്പോര്‍ട്ട് ചെയ്തു. സോഷ്യല്‍ മീഡിയയില്‍ പ്രചരിക്കുന്ന ഞെട്ടിക്കുന്ന ചിത്രങ്ങളും വീഡിയോകളും കത്തിക്കരിഞ്ഞ കെട്ടിടങ്ങളും കത്തിക്കരിഞ്ഞ മൃതദേഹങ്ങളും സമൂഹത്തില്‍ വ്യാപകമായ നാശവും കാണിക്കുന്നു.
