ന്യൂഡല്‍ഹി | 2024 ഒക്ടോബറില്‍ വെടിയേറ്റ് മരിച്ച എന്‍സിപി നേതാവും മഹാരാഷ്ട്ര മുന്‍ മന്ത്രിയുമായ ബാബ സിദ്ദിഖിയുടെ കൊലപാതകക്കേസില്‍ സൂത്രധാരന്‍ സീഷന്‍ അക്തര്‍ എന്ന ജാസി പുരേവാളിനെ കാനഡയില്‍ സറെ പോലീസ് അറസ്റ്റ് ചെയ്തു. ഇന്ത്യന്‍ ഏജന്‍സികള്‍ നല്‍കിയ വിവരങ്ങളുടെ അടിസ്ഥാനത്തിലാണോ അറസ്റ്റ് എന്ന് നിലവില്‍ വ്യക്തമല്ല. സീഷന്‍ അക്തര്‍ നിലവില്‍ കനേഡിയന്‍ പോലീസിന്റെ കസ്റ്റഡിയിലാണ്.
മുംബൈയിലെ ബാന്ദ്ര ഈസ്റ്റിലുള്ള മകന്റെ ഓഫീസിന് പുറത്തുവച്ചാണ് ബാബ സിദ്ദിഖി വെടിയേറ്റ് മരിച്ചത്. അതിനുശേഷം, കൊലപാതകത്തിന്റെ ഉത്തരവാദിത്തം ഗുണ്ടാസംഘം ലോറന്‍സ് സംഘം ഏറ്റെടുത്തു. ബോളിവുഡ് താരം സല്‍മാന്‍ ഖാനുമായി ബാബ സിദ്ദിഖി അടുത്തയാളാണെന്നും അതുകൊണ്ടാണ് കൊലപ്പെടുത്തിയത്. ലോറന്‍സ് സംഘത്തിന് സല്‍മാന്‍ ഖാനുമായി ശത്രുതയുണ്ട്. ഒക്ടോബര്‍ 20 ന്, ഒരു ഇമെയില്‍ വഴി സല്‍മാനെ കൊല്ലുമെന്ന് ഭീഷണിപ്പെടുത്തുകയും ചെയ്തു.
പോലീസ് അന്വേഷണത്തില്‍ സിദ്ദിഖിയുടെ കൊലപാതകത്തിന്റെ മുഖ്യസൂത്രധാരന്‍ ജലന്ധര്‍ സ്വദേശിയായ സീഷന്‍ അക്തറാണെന്ന് കണ്ടെത്തി. കൊലപാതകത്തിന് ശേഷം ഇയാള്‍ വിദേശത്തേക്ക് കടന്നു. പാകിസ്ഥാന്‍ ഡോണ്‍ ഷഹ്സാദ് ഭട്ടിയാണ് ഇയാളെ രക്ഷപ്പെടാന്‍ സഹായിച്ചതെന്ന് അവകാശപ്പെട്ടിരുന്നു.
