തിരുവനന്തപുരം | തിരഞ്ഞെടുപ്പില്‍ പോസ്റ്റല്‍ ബാലറ്റുകളില്‍ കൃത്രിമം നടന്നുവെന്ന സിപിഎം നേതാവ് ജി. സുധാകരന്റെ പ്രസ്താവനയില്‍ കേസ് രജിസ്റ്റര്‍ ചെയ്യും. സുധാകരന്റെ വെളിപ്പെടുത്തല്‍ അതീവ ഗൗരവമുള്ളതാണെന്ന് സംസ്ഥാന മുഖ്യ തിരഞ്ഞെടുപ്പ് ഓഫീസര്‍ (സിഇഒ) വിലയിരുത്തി. വിഷയത്തില്‍ അടിയന്തര നടപടി സ്വീകരിക്കാന്‍ ജില്ലാ തിരഞ്ഞെടുപ്പ് ഓഫീസര്‍ക്ക് സിഇഒ നിര്‍ദ്ദേശം നല്‍കിയിട്ടുണ്ട്.
1989 ലെ പാര്‍ലമെന്റ് തിരഞ്ഞെടുപ്പില്‍ ബാലറ്റ് പേപ്പറുകള്‍ കീറിമുറിച്ച് മാറ്റിയതായി ആലപ്പുഴയില്‍ എന്‍ജിഒ യൂണിയന്‍ സംഘടിപ്പിച്ച പരിപാടിയില്‍ സുധാകരന്‍ വെളിപ്പെടുത്തല്‍ നടത്തിയിരുന്നു. ഈ വിഷയത്തില്‍ ഇപ്പോള്‍ കേസ് ഫയല്‍ ചെയ്താല്‍ തനിക്ക് എതിര്‍പ്പില്ലെന്നും അദ്ദേഹം അഭിപ്രായപ്പെട്ടു. പോസ്റ്റല്‍ വോട്ടുകളില്‍ കൃത്രിമം കാണിക്കുന്നത് തിരഞ്ഞെടുപ്പ് തട്ടിപ്പായി കണക്കാക്കപ്പെടുന്നു. ഇത് ഗുരുതരമായ ക്രിമിനല്‍ കുറ്റമായതിനാല്‍, സുധാകരനെതിരെ എഫ്ഐആര്‍ രജിസ്റ്റര്‍ ചെയ്ത് അന്വേഷണം ആരംഭിക്കാന്‍ ചീഫ് തിരഞ്ഞെടുപ്പ് ഓഫീസര്‍ ജില്ലാ കളക്ടറോട് നിര്‍ദ്ദേശിച്ചു.
വിഷയത്തില്‍ വിശദമായ അന്വേഷണത്തിനും ശുപാര്‍ശ ചെയ്തിട്ടുണ്ട്. ജനപ്രാതിനിധ്യ നിയമം, തിരഞ്ഞെടുപ്പ് നിയമങ്ങള്‍, ഭാരതീയ ന്യായ സംഹിത (ഇന്ത്യന്‍ ശിക്ഷാ നിയമം) എന്നിവയിലെ പ്രസക്തമായ വ്യവസ്ഥകള്‍ അനുസരിച്ചായിരിക്കും കേസ് തുടരുക. തിരഞ്ഞെടുപ്പ് പ്രക്രിയയുടെ സുതാര്യതയെ ദുര്‍ബലപ്പെടുത്തി ഒരു പ്രത്യേക സ്ഥാനാര്‍ത്ഥിക്ക് അനുകൂലമായി തിരഞ്ഞെടുപ്പ് ഫലം കൈകാര്യം ചെയ്യാനുള്ള ശ്രമം ഗുരുതരമായ കുറ്റമായി തിരഞ്ഞെടുപ്പ് കമ്മീഷന്‍ കണക്കാക്കിയിട്ടുണ്ട്. സംഭവിച്ചത് നിയമത്തിന്റെ ഗുരുതരമായ ലംഘനമാണെന്നും കമ്മീഷന്‍ വ്യക്തമാക്കി.
