തിരുവനന്തപുരം | സംസ്ഥാന സര്‍ക്കാര്‍ കേരള വിദേശ മദ്യ നിയമങ്ങള്‍ ഭേദഗതി ചെയ്തു. എല്ലാ മാസവും ഒന്നാം തീയതി ഹോട്ടലുകളില്‍ മദ്യം വിളമ്പാന്‍ അനുവദിക്കും. എല്ലാ മാസവും ഒന്നാം തീയതി ഡ്രൈ ഡേ ആയി നിശ്ചയിക്കുന്ന നിലവിലുള്ള നിയമത്തിന് ഭേദഗതി ഒരു ഇളവ് നല്‍കുന്നതായി വിജ്ഞാപനം പുറപ്പെടുവിച്ചതോടെ, എക്‌സൈസ് കമ്മീഷണര്‍ നല്‍കിയ അനുമതിയുടെ അടിസ്ഥാനത്തില്‍ ഓഗസ്റ്റ് 1 മുതല്‍ ഹോട്ടലുകളില്‍ മദ്യം വിളമ്പാം.
കേന്ദ്രം തരംതിരിച്ചിരിക്കുന്ന ത്രീ-സ്റ്റാര്‍, ഫോര്‍-സ്റ്റാര്‍, ഫൈവ്-സ്റ്റാര്‍, ഹെറിറ്റേജ്, ഹെറിറ്റേജ് ഗ്രാന്‍ഡ്, ഹെറിറ്റേജ് ക്ലാസിക്, ബോട്ടിക് ഹോട്ടലുകള്‍ എന്നിവയ്ക്ക് ഇളവ് ബാധകമാണ്. ഹൈറേഞ്ച്, തീരദേശ മേഖലകളില്‍ സ്ഥിതി ചെയ്യുന്ന ബുട്ടീക്ക് ഹോട്ടലുകള്‍ക്കും റിസോര്‍ട്ടുകള്‍ക്കും മദ്യം വിളമ്പാം. ഇതിനായി അതത് മാസത്തിന്റെ ആദ്യ ദിവസം ഹോട്ടലില്‍ നടക്കുന്ന കോണ്‍ഫറന്‍സിന്റെയോ വിവാഹ സത്കാരത്തിന്റെയോ വിശദാംശങ്ങള്‍ ഉള്‍ക്കൊള്ളുന്ന അപേക്ഷ കുറഞ്ഞത് ഏഴ് ദിവസം മുമ്പെങ്കിലും എക്‌സൈസ് കമ്മീഷണര്‍ക്ക് സമര്‍പ്പിക്കണം. ഒരു ദിവസത്തെ ലൈസന്‍സ് അനുവദിക്കുന്നതിനുള്ള ഫീസ് 50,000 ആണ്. ഈ ചടങ്ങില്‍ മാത്രമേ മദ്യം വിളമ്പാന്‍ കഴിയൂ, ബാര്‍ ലൈസന്‍സ് ഇല്ലാത്ത ഹോട്ടലുകള്‍ക്കും ഈ ഒരു ദിവസത്തെ അനുമതിക്ക് അപേക്ഷിക്കാം.
