തിരുവനന്തപുരം | ഒരു സ്‌കൂളിന്റെ പ്രവേശനോത്സവത്തില്‍ പോക്‌സോ കേസിലെ പ്രതിയായ വിവാദ വേ്‌ളാഗര്‍ മുകേഷ് എം നായരെ പങ്കെടുപ്പിച്ചതില്‍ സ്‌കൂള്‍ അധികൃതര്‍ക്ക് വീഴ്ചയെന്ന് റിപ്പോര്‍ട്ട്. പോക്‌സോ കേസിലും എക്‌സൈസ് കേസിലും കുറ്റാരോപിതനായ വ്‌ലോഗറാണ് മുകേഷ്. തിരുവനന്തപുരത്തെ ഫോര്‍ട്ട് ഹൈസ്‌കൂളില്‍ നടന്ന പ്രവേശനോത്സവ ചടങ്ങിലാണ് മുകേഷ് എം നായരെ മുഖ്യാതിഥിയായി ക്ഷണിച്ചത്. സംസ്ഥാന വിദ്യാഭ്യാസ മന്ത്രി അടിയന്തര അന്വേഷണത്തിന് ഉത്തരവിട്ടു, വിശദമായ റിപ്പോര്‍ട്ട് സമര്‍പ്പിക്കാന്‍ തിരുവനന്തപുരം വിദ്യാഭ്യാസ ഡെപ്യൂട്ടി ഡയറക്ടറോട് നിര്‍ദ്ദേശിച്ചു.
ഈ സംഭവത്തില്‍ സ്‌കൂളിന്റെ ഭാഗത്ത് നിന്ന് വ്യക്തമായ വീഴ്ചയുണ്ടായെന്നാണ് ഔദ്യോഗിക റിപ്പോര്‍ട്ട്. സംഭവത്തിന്റെ ഉത്തരവാദിത്തത്തില്‍ നിന്ന് സ്‌കൂള്‍ അധികൃതര്‍ക്ക് ഒഴിഞ്ഞുമാറാന്‍ കഴിയില്ലെന്നും റിപ്പോര്‍ട്ടില്‍ പറയുന്നു.
ഉപജില്ലാ വിദ്യാഭ്യാസ ഓഫീസര്‍ക്ക് സമര്‍പ്പിച്ച പ്രസ്താവനയില്‍, സ്‌കൂള്‍ ഔദ്യോഗികമായി പ്രാദേശിക വാര്‍ഡ് കൗണ്‍സിലര്‍ ജാനകി അമ്മാളിനെ മാത്രമേ പരിപാടിയിലേക്ക് ക്ഷണിച്ചിട്ടുള്ളൂവെന്നാണ് ഹെഡ്മാസ്റ്ററുടെ മൊഴി.
വര്‍ഷങ്ങളായി സ്‌കൂളില്‍ വിദ്യാഭ്യാസ സാമഗ്രികളും സ്‌കോളര്‍ഷിപ്പുകളും വിതരണം ചെയ്യുന്ന ഒരു സന്നദ്ധ സംഘടനയായ ജെസിഐയും പരിപാടിയില്‍ ഉള്‍പ്പെട്ടിരുന്നു. മുകേഷ് പങ്കെടുക്കുമെന്ന് ജെസിഐ സ്‌കൂളിനെ അറിയിച്ചിരുന്നില്ലായെന്നും ഹെഡ്മാസ്റ്റര്‍ പറഞ്ഞു. ”ഒരു സെലിബ്രിറ്റി അതിഥിയാകുമെന്ന് മാത്രമാണ് അവര്‍ പറഞ്ഞത്. പരിപാടിക്കിടെ മുകേഷ് അപ്രതീക്ഷിതമായി എത്തിയെന്നും ആ സമയത്ത് അദ്ദേഹത്തെ തിരിച്ചറിയാന്‍ കഴിഞ്ഞില്ലെന്നും ഹെഡ്മാസ്റ്റര്‍ പറഞ്ഞു.
അതിഥികളെ പരിശോധിക്കുന്നതിലും പരിപാടിയില്‍ ഉചിതമായ പങ്കാളിത്തം ഉറപ്പാക്കുന്നതിലും സ്‌കൂള്‍ പരാജയപ്പെട്ടുവെന്ന് ഉപജില്ലാ ഓഫീസറുടെ റിപ്പോര്‍ട്ടിലുണ്ട്. ഉടന്‍ നടപടി ഉണ്ടാകുമെന്നാണ് വിദ്യാഭ്യാസവകുപ്പില്‍ നിന്നും ലഭിക്കുന്ന വിവരം.
