ഇന്ത്യയില്‍ കുടിവെള്ളത്തിനും ജലസേചനത്തിനും പ്രധാനമായി ആശ്രയിക്കുന്ന ഭൂഗര്‍ഭജലത്തിലെ മലിനീകരണം പൊതുജനാരോഗ്യത്തിനു ഗുരുതര ഭീഷണി ഉയര്‍ത്തുന്നു.
കേന്ദ്ര ഭൂഗര്‍ഭജല ബോര്‍ഡിന്റെ 2024 ലെ വാര്‍ഷിക ഭൂഗര്‍ഭജല ഗുണനിലവാര റിപ്പോര്‍ട്ടാണ് രാജ്യത്തുടനീളമുള്ള മലിനീകരണത്തിന്റെ ഭയാനകമായ അളവ് വെളിപ്പെടുത്തുന്നത്. ഭൂഗര്‍ഭജല മലിനീകരണ പ്രതിസന്ധി ഇനി പരിസ്ഥിതി പ്രശ്‌നങ്ങളില്‍ മാത്രം ഒതുങ്ങുന്നതല്ലെന്ന വ്യക്തമാക്കുന്നതു കൂടിയാണ് പുതിയ റിപ്പോര്‍ട്ട്. നൈട്രേറ്റുകള്‍, ഫ്‌ലൂറൈഡ്, ആര്‍സെനിക്, യുറേനിയം, ഘന ലോഹങ്ങള്‍ എന്നിവയാല്‍ വ്യാപകമായ മലിനീകരണം ഭൂഗര്‍ഭജലത്തില്‍ ഉണ്ടെന്നാണ് 2024 ലെ കേന്ദ്ര ഭൂഗര്‍ഭജല ബോര്‍ഡ് റിപ്പോര്‍ട്ട് പറയുന്നത്.
20% ത്തിലധികം ഭൂഗര്‍ഭജല സാമ്പിളുകളിലും നൈട്രേറ്റ് മലിനീകരണം കണ്ടെത്തിയെന്ന് റിപ്പോര്‍ട്ട് വ്യക്തമാക്കുന്നു. അമിതമായ രാസവള ഉപയോഗവും മോശം ശുചിത്വവുമാണ് ഇതിലേക്ക് നയിക്കുന്നത്. രാജസ്ഥാന്‍, ആന്ധ്രാപ്രദേശ് തുടങ്ങിയ സംസ്ഥാനങ്ങളില്‍ ഫ്‌ലൂറൈഡ് മലിനീകരണം 9% ത്തിലധികം സാമ്പിളുകളെ ബാധിച്ചിട്ടുണ്ട്. ഇത് പല്ലുകളുടെയും അസ്ഥികൂടങ്ങളുടെയും ഫ്‌ലൂറോസിസിന് കാരണമാകും. പഞ്ചാബ്, ബീഹാര്‍ എന്നിവിടങ്ങളിലെ ആര്‍സെനിക് മലിനീകരണം ലോകാരോഗ്യ സംഘടനയുടെ പരിധി കവിഞ്ഞാണ്. ഇത് കാന്‍സര്‍ സാധ്യത വര്‍ദ്ധിപ്പിക്കുന്നു. യുറേനിയം, ഇരുമ്പ് മലിനീകരണം എന്നിവയും ഗുരുതരമായ ആരോഗ്യ ഭീഷണികള്‍ ഉയര്‍ത്തുന്നു. വ്യാവസായിക മാലിന്യങ്ങളില്‍ നിന്നുള്ള ഘന ലോഹങ്ങള്‍ നാഡീ, വികസന വൈകല്യങ്ങള്‍ക്ക് കാരണമാകുന്നതാണ്.
ഇന്ത്യയുടെ ഭൂഗര്‍ഭജലം കടുത്ത മലിനീകരണ പ്രതിസന്ധി നേരിടുന്നു. ഈ അദൃശ്യ ഭീഷണി ദശലക്ഷക്കണക്കിന് ആളുകളെ, പ്രത്യേകിച്ച് ഭൂഗര്‍ഭജലത്തെ ആശ്രയിക്കുന്ന ഗ്രാമപ്രദേശങ്ങളിലെ ജനങ്ങളെ അപകടത്തിലാക്കുന്നു.
ഇവ ഉണ്ടാക്കുന്ന ആരോഗ്യ പ്രശ്‌നങ്ങള്‍ വലുതാണ്. ഫ്‌ലൂറൈഡ് സമ്പര്‍ക്കം മൂലം ദശലക്ഷക്കണക്കിന് ആളുകളുടെ അസ്ഥികൂട വൈകല്യങ്ങളും വളര്‍ച്ച മുരടിപ്പും ഉണ്ടാകുന്നു. ആഴ്‌സനിക് ചര്‍മ്മത്തിന് ക്ഷതം, കാന്‍സര്‍, ശ്വസന പ്രശ്‌നങ്ങള്‍ എന്നിവ ഉണ്ടാക്കുന്നു. നൈട്രേറ്റ് മലിനീകരണം ബ്ലൂ ബേബി സിന്‍ഡ്രോം, നൈട്രേറ്റ് വിഷബാധ എന്നിവയ്ക്ക് കാരണമാകുകയും ആശുപത്രിയില്‍ പ്രവേശിപ്പിക്കപ്പെടുന്നവരുടെ എണ്ണം വര്‍ദ്ധിക്കുകയും ചെയ്യുന്നു. യുറേനിയം സമ്പര്‍ക്കം മൂലം വിട്ടുമാറാത്ത വൃക്ക തകരാറുകള്‍ ഉണ്ടാകാനുള്ള സാധ്യത കൂടുതലാണ്. ഘന ലോഹങ്ങള്‍ വിളര്‍ച്ച, രോഗപ്രതിരോധ വൈകല്യങ്ങള്‍, നാഡീവ്യവസ്ഥയ്ക്ക് കേടുപാടുകള്‍ എന്നിവ ഉണ്ടാക്കുന്നു. മലിനജലം കലര്‍ന്ന ഭൂഗര്‍ഭജലത്തില്‍ നിന്നാണ് കോളറ, ഹെപ്പറ്റൈറ്റിസ് തുടങ്ങിയ ജലജന്യ രോഗങ്ങള്‍ ഉണ്ടാകുന്നത്.
അമിത ജലചൂഷണം, വ്യാവസായിക ജലചൂഷണം, ദുര്‍ബലമായ നിയന്ത്രണ നിര്‍വ്വഹണം എന്നിവയാണ് പ്രതിസന്ധിക്ക് കാരണം. ഇന്ത്യയിലെ ഗ്രാമീണ കുടിവെള്ളത്തിന്റെ 85% ത്തിലധികവും ജലസേചന ജലത്തിന്റെ 65% വും ഭൂഗര്‍ഭജലത്തില്‍ നിന്നാണ് വരുന്നത്. സമൃദ്ധമായ നദികളും മണ്‍സൂണും ഉണ്ടായിരുന്നിട്ടും, ഗാര്‍ഹിക, കാര്‍ഷിക ഉപയോഗത്തിന് ഭൂഗര്‍ഭജലം ഇപ്പോഴും പ്രധാന ആശ്രയമാണ്.
1974 ലെ ജല (മലിനീകരണ നിയന്ത്രണവും പ്രതിരോധവും) നിയമം ഭൂഗര്‍ഭജലത്തെ വേണ്ടത്ര പരിഗണിക്കുന്നതല്ല. സംസ്ഥാന മലിനീകരണ നിയന്ത്രണ ബോര്‍ഡുകള്‍ക്ക് വിഭവശേഷി കുറവാണ്. സിജിഡബ്ല്യുബി, സിപിസിബി, എസ്പിസിബികള്‍, ജലശക്തി മന്ത്രാലയം തുടങ്ങിയ ഏജന്‍സികള്‍ തമ്മിലുള്ള ഏകോപനം ദുര്‍ബലമാണ്. നിരീക്ഷണം അപൂര്‍വമാണ്, കൂടാതെ ഡാറ്റ പൊതുജനങ്ങള്‍ക്ക് ലഭ്യമാകുന്നില്ല. അമിതമായി വെള്ളം വലിച്ചെടുക്കുന്നത് ജലവിതാനങ്ങള്‍ താഴ്ത്തിയും വിഷവസ്തുക്കളെ കേന്ദ്രീകരിച്ചും മലിനീകരണം വര്‍ദ്ധിപ്പിക്കുന്നു.
