ന്യൂഡല്‍ഹി | ഇറാനിലെ അരാക്കിലെ ആണവ റിയാക്ടറില്‍ കേന്ദ്രത്തിന് സമീപമുള്ള ജനങ്ങളോട് ഒഴിഞ്ഞുമാറാന്‍ ഇസ്രായേല്‍ സൈന്യം സോഷ്യല്‍ മീഡിയ വഴി മുന്നറിയിപ്പ് നല്‍കിയതിനു പിന്നാലെ ആക്രമണം. ലക്ഷ്യമിടാന്‍ അടയാളപ്പെടുത്തിയ സ്ഥലത്തിന്റെ ഉപഗ്രഹ ചിത്രങ്ങള്‍ക്കൊപ്പമാണ് ഇസ്രായേല്‍ മുന്നറിയിപ്പ് നല്‍കിയത്. ടെഹ്റാനില്‍ നിന്ന് ഏകദേശം 250 കിലോമീറ്റര്‍ തെക്ക് പടിഞ്ഞാറായി സ്ഥിതി ചെയ്യുന്നതാണ് അരാക്കിലെ റിയാക്ടര്‍.
ഇറാന്റെ ആണവ കേന്ദ്രങ്ങള്‍ ലക്ഷ്യമിട്ട് ഇന്നലെ നടത്തിയ ഏറ്റവും വലിയ ആക്രമണമാണിത്. ഇറാന്റെ നതാന്‍സിലുള്ള സമ്പുഷ്ടീകരണ കേന്ദ്രം, ടെഹ്റാനിനടുത്തുള്ള സെന്‍ട്രിഫ്യൂജ് ഉല്‍പാദന കേന്ദ്രങ്ങള്‍, ഇസ്ഫഹാനിലെ ഒരു ആണവ കേന്ദ്രം എന്നിവ ഇസ്രായേല്‍ ഇതിനകം ലക്ഷ്യമിട്ടിട്ടുണ്ട്. ഇന്നലെ ഇറാനും ഇസ്രായേലി ലക്ഷ്യങ്ങളിലേക്ക് 400-ലധികം മിസൈലുകളും നൂറുകണക്കിന് ഡ്രോണുകളും വിക്ഷേപിച്ചു. കുറഞ്ഞത് 24 പേര്‍ കൊല്ലപ്പെടുകയും നൂറുകണക്കിന് പേര്‍ക്ക് പരിക്കേല്‍ക്കുകയും ചെയ്തു.
അന്താരാഷ്ട്ര ആണവോര്‍ജ്ജ ഏജന്‍സി (IAEA) ആണവ കേന്ദ്രങ്ങള്‍ ലക്ഷ്യമിടുന്നതിനെതിരെ ഇസ്രായേലിന് ആവര്‍ത്തിച്ച് മുന്നറിയിപ്പ് നല്‍കിയിട്ടുണ്ട്. 2015 ലെ ആണവ കരാര്‍ പ്രകാരം, അരാക്കിലെ കേന്ദ്രം പുനര്‍രൂപകല്‍പ്പന ചെയ്യാനും അതിന്റെ പ്ലൂട്ടോണിയം ഉല്‍പാദന ശേഷി പരിമിതപ്പെടുത്തുന്നതിന് അധിക ഘനജലം കയറ്റുമതി ചെയ്യാനും ഇറാന്‍ സമ്മതിച്ചിരുന്നു. 2018 ല്‍ പ്രസിഡന്റ് ഡൊണാള്‍ഡ് ട്രംപിന്റെ കീഴില്‍ യുഎസ് ഉപേക്ഷിച്ച കരാറില്‍, അരാക്കിന്റെ പരിഷ്‌കാരങ്ങള്‍ക്ക് മേല്‍നോട്ടം വഹിക്കാന്‍ ബ്രിട്ടന്റെയും മറ്റ് പാശ്ചാത്യ രാജ്യങ്ങളുടെയും പിന്തുണ ഉണ്ടായിരുന്നു.ആണവായുധങ്ങള്‍ ഔദ്യോഗികമായി ഒരിക്കലും അംഗീകരിച്ചിട്ടില്ലെങ്കിലും, മധ്യപൂര്‍വദേശത്ത് ആണവായുധങ്ങളുള്ള ഏക രാജ്യമാണ് ഇസ്രായേല്‍.
