തിരുവനന്തപുരം | 2040ഓടെ പൂർണമായും പുനരുപയോഗ ഊർജത്തെ ആശ്രയിക്കുന്ന സംസ്ഥാനമാകാനുള്ള കേരളത്തിന്റെ ലക്ഷ്യം നിലവിലെ ശേഷി വർദ്ധനവ് പ്രവണതകൾ കണക്കിലെടുക്കുമ്പോൾ വലിയ വെല്ലുവിളിയാകുമെന്ന് വേൾഡ് റിസോഴ്‌സസ് ഇൻസ്റ്റിറ്റ്യൂട്ട് (WRI) ഇന്ത്യയുടെ പഠനം പറയുന്നു. താപവൈദ്യുതിയുടെ സഹായമില്ലാതെ ജലവൈദ്യുതി, ആണവ വൈദ്യുതി, പുനരുപയോഗ ഊർജം എന്നിവയിലൂടെ മാത്രം ആവശ്യം നിറവേറ്റണമെങ്കിൽ കുറഞ്ഞത് 27 ജിഗാവാട്ട് പുതിയ പുനരുപയോഗ ഊർജശേഷി കൂട്ടിച്ചേർക്കേണ്ടിവരുമെന്ന് “കേരളത്തിന്റെ ശുദ്ധമായ ഊർജ്ജ പരിവർത്തനത്തിനായുള്ള പാതകൾ” എന്ന പഠനത്തിൽ പറയുന്നു. കെ.എസ്.ഇ.ബിയും ഡബ്ല്യു.ആർ.ഐ. ഇന്ത്യയും ചേർന്ന് തിരുവനന്തപുരത്ത് സംഘടിപ്പിച്ച ശിൽപ്പശാലയിലാണ് പഠനം അവതരിപ്പിച്ചത്.
കേരളം നിലവിൽ വൈദ്യുതിയുടെ ഏകദേശം 70% ഇറക്കുമതി ചെയ്യുന്നത് പ്രധാനമായും സംസ്ഥാനത്തിന് പുറത്തുള്ള താപവൈദ്യുത നിലയങ്ങളിൽ നിന്നാണ്. 2024-25 സാമ്പത്തിക വർഷത്തിൽ, വൈദ്യുതി വിതരണത്തിന്റെ 54% താപ സ്രോതസ്സുകളാണ്. 20% വലിയ ജലവൈദ്യുതിയും 8% ആണവവുമാണ്. കാറ്റാടി, സൗരോർജം, ചെറുകിട ജലവൈദ്യുതി എന്നിവയുടെ വിഹിതം ഏഴ് ശതമാനം മാത്രമാണ്.
താപവൈദ്യുതി കേന്ദ്രീകൃത സംവിധാനത്തിൽനിന്ന് പൂർണ ഹരിത ഊർജത്തിലേക്ക് മാറാൻ ഏകദേശം 64,890 കോടി രൂപ നിക്ഷേപം ആവശ്യമായി വരും. നിലവിലെ രീതിയിൽ മുന്നോട്ടുപോകുന്ന സാഹചര്യത്തേക്കാൾ 96 ശതമാനം അധികമാണിത്. 2040 ഓടെ 100 ശതമാനം പുനരുപയോഗ ഊർജത്തിലേക്ക് മാറാൻ സൗരോർജം, കാറ്റാടി തുടങ്ങിയ വിവിധ സാങ്കേതികവിദ്യകൾ വേഗത്തിൽ വികസിപ്പിക്കുക, ഇതര സംസ്ഥാനങ്ങളിലെ വൈദ്യുതി ഉൽപാദകരുമായി ദീർഘകാല കരാറുകൾ ഉണ്ടാക്കുക, വികേന്ദ്രീകൃത ഹരിത ഊർജ പദ്ധതികൾ വ്യാപിപ്പിക്കുക എന്നിവയാണ് പഠനത്തിലെ നിർദേശങ്ങൾ. ഇതിനായി സ്വകാര്യ, രാജ്യാന്തര നിക്ഷേപവും പ്രയോജനപ്പെടുത്തേണ്ടിവരും.
നിലവിലെ നയങ്ങളും മുൻകാല പ്രവണതകളും തുടരുന്ന ബിസിനസ് ആസ് യൂഷ്വൽ സാഹചര്യത്തിൽ 2030ലെ വൈദ്യുതി ആവശ്യം നിറവേറ്റാനാകുമെങ്കിലും 2035ന് ശേഷം ഉൽപാദനക്കുറവുണ്ടാകാം. 2030ലെ ആവശ്യം 35,668 ദശലക്ഷം യൂണിറ്റും 2040ലെ ആവശ്യം 56,057 ദശലക്ഷം യൂണിറ്റുമായാണ് പഠനം കണക്കാക്കുന്നത്.
ഉയർന്ന പുനരുപയോഗ ഊർജ സാഹചര്യം നടപ്പാക്കിയാൽ 2040ൽ പുനരുപയോഗ ഊർജത്തിന്റെ വിഹിതം 26 ശതമാനമാകും. എന്നാൽ താപവൈദ്യുതിയുടെ വിഹിതം 37 ശതമാനമായി തുടരും. അതേസമയം, കാലാവധി കഴിയുന്ന താപവൈദ്യുതി വാങ്ങൽ കരാറുകൾ പുതുക്കാത്ത കുറഞ്ഞ താപവൈദ്യുതി സാഹചര്യം സ്വീകരിച്ചാൽ 2034ഓടെ വലിയ വൈദ്യുതി ക്ഷാമമുണ്ടാകാം. സൗരോർജം, കാറ്റാടി, മറ്റ് ഹരിത ഊർജ പദ്ധതികൾ എന്നിവയുടെ ശേഷി വർധിപ്പിച്ചാൽ പുനരുപയോഗ ഊർജത്തിന്റെ വിഹിതം 2040ൽ 48 ശതമാനമാക്കാനാകുമെങ്കിലും താപവൈദ്യുതിയുടെ വിഹിതം ഏകദേശം 29 ശതമാനം തുടരുമെന്നും പഠനം പറയുന്നു.
Kerala’s target of becoming a 100% renewable energy-based state by 2040 is unlikely to be achieved under current capacity addition trends, according to World Resources Institute (WRI) study, “Pathways for Kerala’s Clean Energy Transition”
