കുറവന്‍കോണം | പട്ടം കവടിയാര്‍ റോഡിലാണ് ആര്‍പി ലെയിന്‍. പലതരം ടൈലൊക്കെ വിരിച്ച് മനോഹരമാക്കിയിരിക്കുന്ന ഈ റോഡില്‍ വൈകുന്നേരത്തെ പതിവു നടത്തവുമായി ഒത്തിരിപ്പേരെ സ്മാര്‍ട്ട്‌വേ കണ്ടു. കുറവന്‍കോണം വാര്‍ഡാണ്.
വെട്ടിമുറിക്കലുകളില്‍ അധികം പരിക്കില്ലാതെ രക്ഷപെട്ട കുറവന്‍കോണം. അമ്പലമുക്ക് ഭാഗത്തെ 210 വോട്ടുകളാണ് കുറവന്‍കോണത്തിനു നഷ്ട്ടപ്പെട്ടത്. വെട്ടിമാറ്റപ്പെട്ട വോട്ടുകളുണ്ടായിരുന്ന ബൂത്തില്‍ കഴിഞ്ഞ തദ്ദേശ തെരഞ്ഞെടുപ്പില്‍ ബി.ജെ.പിയായിരുന്നു മുന്നില്‍. പതിവുപോലെ ജയിച്ചത് ആര്‍.എസ്.പിയുടെ പി. ശ്യാം കുമാറാണ്.
കുറവന്‍കോണത്തിനും ആര്‍എസ്പിക്കും ഇടയില്‍ വേര്‍പിരിയാനാവാത്ത ബന്ധമാണ്. 66നു ശേഷമുള്ള തെരഞ്ഞെടുപ്പുകള്‍ പരിശോധിച്ചാല്‍ ഒരിക്കല്‍ മാത്രമാണ് ആര്‍എസ്പിയെ കുറവന്‍കോണം കൈവിട്ടത്. നാലാമത്തെ ഊഴമാണ് ശ്യാം കുമാര്‍ ഇവിടെ പൂര്‍ത്തിയാക്കുന്നത്. എന്നുവച്ചാല്‍, 2015 വരെ ആര്‍.എസ്.പി ഇടതു മുന്നണിയിലായിരുന്നപ്പോഴും അതിനുശേഷം യു.ഡി.എഫില്‍ തുടരുമ്പോഴും ആര്‍എസ്പിക്കും കുറവന്‍കോണത്തിനും ഇടയിലെ കെമസ്ട്രിക്കു മാറ്റം വന്നിട്ടില്ല.
