വാഷിങ്ടൺ: അമേരിക്കൻ മുൻ പ്രസിഡന്‍റ് ഡൊണാൾഡ് ട്രംപിന് ഫേസ്ബുക്ക് ഏർപ്പെടുത്തിയ വിലക്ക് തുടരും. ഇത്തരം കാര്യങ്ങൾ പരിശോധിക്കാനായി ഫേസ്ബുക്ക് രൂപീകരിച്ച മേൽനോട്ട ബോർഡ് തീരുമാനത്തെ പിന്തുണച്ചതോടെയാണ് ഇത്. ജനുവരി ആറിന് യുഎസ് കാപ്പിറ്റോൾ ആക്രമണിത്തിന് പിന്നാലെയായിരുന്നു ട്രംപിന്‍റെ അക്കൗണ്ടിന് ഫേസ്ബുക്ക് വിലക്കേർപ്പെടുത്തിയത്.

കലാപകാരികളെ പ്രശംസിച്ചുള്ള ജനുവരി ആറിലെ ട്രംപിന്‍റെ പോസ്റ്റ് ഫേസ്ബുക്ക് നയങ്ങളെ “കർശനമായി ലംഘിച്ചു” എന്നും “ഗുരുതരമായ അക്രമ സാധ്യതയുള്ള ഒരു അന്തരീക്ഷം സൃഷ്ടിച്ചു” എന്നും ബോർഡ് പറഞ്ഞു. അതേസമയം ഫേസ്ബുക്കിനെതിരെയും ബോർഡ് വിമർനങ്ങൾ ഉന്നയിച്ചെന്നാണ് സിഎൻഎൻ റിപ്പോർട്ട്. അനിശ്ചിതകാലത്തേക്ക് സസ്പെൻഷൻ ഏർപ്പെടുത്തുന്നതിനെതിരെയാണ് വിമർശനം.

ഫേസ്ബുക്ക് തീരുമാനം അവലോകനം ചെയ്യണമെന്നും സസ്പെൻഷൻ സമയബന്ധിതമായോ അല്ലെങ്കിൽ സ്ഥിരമായി അക്കൗണ്ട് ഇല്ലാതാക്കുകയോ വേണണമെന്നാണ് ബോർഡ് പറഞ്ഞത്. വിലക്കേർപ്പെടുത്താനുള്ള തീരുമാനം ശരിവെച്ച് തന്നെയാണ് ഈ നിരീക്ഷണം. ട്രംപിന് നല്‍കിയിരിക്കുന്ന സസ്പെന്‍ഷന്‍ പുനപരിശോധിക്കേണ്ട അവസ്ഥ ഇപ്പോഴില്ലെന്നാണ് ബോര്‍ഡ് തങ്ങളുടെ ഉത്തരവില്‍ പറയുന്നത്.

ഭാവിയില്‍ ഉൾപ്പെടെ ഉണ്ടാകുന്ന പ്രശ്നങ്ങളും, നിയമലംഘനത്തിന്‍റെ തോതും കണക്കിലെടുത്താണ് ഫേസ്ബുക്കില്‍ നിന്നും ട്രംപിനെ പുറത്താക്കിയത്, ഗുരുതരമായ നിയമലംഘനം നടന്നു എന്നതിനാല്‍ അതിന് തക്കതായ ശിക്ഷയാണ് ഇപ്പോള്‍ തുടരുന്നതെന്നും ബോര്‍ഡ് ഉത്തരവില്‍ പറയുന്നു. ഫേസ്ബുക്കിന്‍റെ ഉടമസ്ഥതയിലുള്ള ഇൻസ്റ്റാഗ്രാമിലും ഈ വിലക്ക് ബാധകമാണെന്നാണ് റിപ്പോർട്ട്.

LEAVE A REPLY

Please enter your comment!
Please enter your name here