തിരുവനന്തപുരം: കൊവിഡ്-19 പ്രതിരോധ പ്രവർത്തനങ്ങളുടെ ഭാഗമായി താൽക്കാലികമായി അടച്ചിട്ട സംസ്ഥാനത്തെ തിയേറ്ററുകൾ ബുധനാഴ്‌ച മുതൽ തുറന്ന് പ്രവർത്തിക്കും. ഫിലിം ചേമ്പർ ഓഫ് കോമേഴ്‌സിൻ്റേതാണ് തീരുമാനം.


മാസ്‌റ്റർ ആണ് തിയേറ്ററിലെത്തുന്ന ആദ്യ ചിത്രം. മുഖ്യമന്ത്രി പിണറായി വിജയനുമായി സിനിമാ സംഘടന പ്രതിനിധികൾ ചർച്ച നടത്തിയിരുന്നു. ആവശ്യങ്ങളെല്ലാം സർക്കാർ അംഗീകരിച്ചതായും നിലവിലെ തർക്കങ്ങൾ അവസാനിച്ചതായും ഫിലിം ചേമ്പർ പ്രതിനിധികൾ പറഞ്ഞു. സർക്കാരിനോട് നന്ദി രേഖപ്പെടുത്തുന്നതായും മലയാള സിനിമകള്‍ മുന്‍ഗണനാ ക്രമത്തിൽ റിലീസ് ചെയ്യുമെന്നും സംഘടന വ്യക്തമാക്കി.

സിനിമയുടെ മുതൽ മുടക്ക് അനുസരിച്ച് റിലീസ് ചെയ്യേണ്ട തിയേറ്ററുകളുടെ എണ്ണം തീരുമാനിക്കും. നിർമ്മാതാക്കളും തിയേറ്റർ ഉടമകളും തമ്മിലുണ്ടായത് കുടുംബപ്രശ്‌നമാണ്. ആ വിഷയങ്ങളെല്ലാം പൂർണമായി പരിഹരിച്ചുവെന്നും ഭാരവാഹികൾ വാർത്താ സമ്മേളനത്തിൽ അറിയിച്ചു. വിതരണക്കാരുടെ കുടിശിക നല്‍കാന്‍ തീയേറ്റർ ഉടമകള്‍ സമയം നിശ്ചയിച്ചു. സെന്‍സര്‍ പൂര്‍ത്തിയായ 11 ചിത്രങ്ങളുടെ റിലീസ് വിതരണക്കാര്‍ നിശ്ചയിക്കും.

സംസ്ഥാനത്തെ സിനിമാ തിയേറ്ററുകൾ തുറക്കാൻ മുഖ്യമന്ത്രിയുമായി വിവിധ സംഘടനകൾ നടത്തിയ ചർച്ചയിൽ തീരുമാനമായിരുന്നു. 2021 ജനുവരി മുതല്‍ മാര്‍ച്ച് വരെയുള്ള സിനിമാ തിയേറ്ററുകളുടെ വിനോദ നികുതി ഒഴിവാക്കാന്‍ സംസ്ഥാന സര്‍ക്കാര്‍ തീരുമാനിച്ചതായി മുഖ്യമന്ത്രി അറിയിച്ചു. തിയേറ്ററുകള്‍ അടഞ്ഞുകിടന്ന പത്തുമാസത്തെ വൈദ്യുതി ഫിക്സഡ് ചാര്‍ജ്ജ് 50 ശതമാനമാക്കി കുറയ്ക്കും. ബാക്കി ഗഡുക്കളായി അടയ്ക്കാന്‍ അനുവദിക്കും. 2020 മാര്‍ച്ച് 31നുള്ളില്‍ തിയേറ്ററുകള്‍ തദ്ദേശസ്ഥാപനങ്ങളില്‍ ഒടുക്കേണ്ട വസ്തുനികുതി മാസഗഡുക്കളായി അടക്കാം.

LEAVE A REPLY

Please enter your comment!
Please enter your name here