കണ്ണൂര്‍: പാനൂരിൽ മുസ്ലീം ലീഗ് പ്രവര്‍ത്തകൻ്റെ കൊലപാതകത്തിൻ്റെ പശ്ചാത്തലത്തിൽ നടത്തിയ സമാധാനയോഗം ബഹിഷ്കരിച്ച് യുഡിഎഫ്. കണ്ണൂര്‍ ജില്ലാ കളക്ടറുടെ അധ്യക്ഷതയിൽ ചേര്‍ന്ന യോഗമാണ് യുഡിഎഫ് നേതാക്കള്‍ ബഹിഷ്കരിച്ചത്. സര്‍ക്കാര്‍ ഏകപക്ഷീയമായി പെരുമാറുകയാണെന്നും യുഡിഎഫ് പ്രവര്‍ത്തകരെ വേട്ടയാടുകയാണെന്നും യുഡിഎഫ് നേതാക്കള്‍ ആരോപിച്ചു. പോലീസിനെ വിശ്വാസമില്ലെന്നും യുഡിഎഫ് നേതാക്കള്‍ മാധ്യമങ്ങളോടു പ്രതികരിച്ചു.

ചര്‍ച്ചയ്ക്കെത്തിയത് കൊലപാതകികളുടെ നേതാക്കളാണെന്ന് ഡിസിസി അധ്യക്ഷൻ പ്രതികരിച്ചു. കൊലയാളികൾക്കെതിരെ പോലീസ് ഒരു നടപടിയും സ്വീകരിച്ചില്ല. അവരുമായി തങ്ങള്‍ ചര്‍ച്ചയ്ക്കില്ല. പോലീസ് നടപടികള്‍ ഏകപക്ഷീയമാണെന്നും അദ്ദേഹം പറഞ്ഞു.

കൊലപാതകം നടന്നിട്ടും പ്രതികളെ പിടികൂടാത്ത പോലീസ് അറസ്റ്റ് ചെയ്തത് നാട്ടുകാർ പിടിച്ചു കൊടുത്ത പ്രതിയെ മാത്രമാണ്. എന്നാൽ സിപിഎം ഓഫീസുകൾ ആക്രമിച്ചെന്ന പേരിൽ യുഡിഎഫ് പ്രവർത്തകരെ കസ്റ്റഡിയിലെടുത്ത് ക്രൂരമായി മർദ്ദിച്ചു. കൊല്ലപ്പെട്ട മൻസൂറിൻ്റെ സംസ്കാരം കഴിഞ്ഞു മടങ്ങുന്നതിനിടെ പത്താം ക്ലാസ് പരീക്ഷ എഴുതേണ്ട കുട്ടിയെ കസ്റ്റഡിയിലെടുത്തെന്നും കെഞ്ചി പറഞ്ഞിട്ടും വിട്ടയച്ചില്ലെന്നും നേതാക്കൾ ആരോപിച്ചു.

പാനൂരിൽ മരിച്ച ലീഗ് പ്രവര്‍ത്തകൻ്റെ മൃതദേഹം വഹിച്ചുള്ള വിലാപയാത്ര പുറപ്പെട്ടതിനു പിന്നാലെ സ്ഥലത്ത് സംഘര്‍ഷാവസ്ഥ രൂപപ്പെട്ടിരുന്നു. പ്രദേശത്തെ സിപിഎം ഓഫീസുകള്‍ക്ക് നേര്‍ക്ക് വ്യാപകമായ ആക്രമണം നടന്നിരുന്നു. ഇതിനു പിന്നാലെ ആക്രമണം നടന്ന സ്ഥലങ്ങള്‍ മുതിര്‍ന്ന സിപിഎം നേതാക്കള്‍ സ്ഥലത്തെത്തി സന്ദര്‍ശിച്ചിരുന്നു. ഈ സാഹചര്യത്തിലായിരുന്നു കളക്ടറുടെ അധ്യക്ഷതയിൽ ഇന്നു പതിനൊന്നു മണിയ്ക്ക് സമാധാനയോഗം വിളിച്ചത്. സ്ഥലത്ത് സംഘര്‍ഷാവസ്ഥ തുടരുന്ന സാഹചര്യത്തിൽ പുല്ലൂക്കര – പാറാൽ പ്രദേശത്ത് കൂടുതൽ പോലീസിനെയും വിന്യസിച്ചിട്ടുണ്ട്.

ബാവാച്ചി റോഡിൽ പ്രവര്‍ത്തിക്കുന്ന പെരിങ്ങത്തൂര്‍ ലോക്കൽ കമ്മിറ്റി ഓഫീസും പെരിങ്ങത്തൂര്‍ ബ്രാഞ്ച് ഓഫീസും ആക്രമിക്കപ്പെട്ടു. കൂടാതെ ആച്ചുമുക്കിലുള്ള ഓഫീസും അടിച്ചു തകര്‍ത്ത ശേഷം തീയിട്ടു. കടവത്തൂര്‍ ഇരഞ്ഞീൻകീഴിൽ ഇഎംഎസ് സ്മാരക വായനശാല, കൃഷ്ണപിള്ള മന്ദിരം തുടങ്ങിയവയും ആക്രമണത്തിന് ഇരയായി.കൂടാതെ ഡിവൈഎഫ്ഐപെരിങ്ങളം മേഖലാ ഖജാൻജി കെ പി ഷുഹൈലിൻ്റെ വീടിനു നേര്‍ക്കും ആക്രമണം നടന്നു. ടൗണിലെ ചില കടകള്‍ക്കു നേര്‍ക്കും ആക്രമണം നടന്നതായും റിപ്പോര്‍ട്ടുകളുണ്ട്.

LEAVE A REPLY

Please enter your comment!
Please enter your name here