തിരുവനന്തപുരം: തനിക്ക് വിദേശത്ത് നിക്ഷേപമുണ്ടെന്ന സ്വർണ്ണക്കടത്ത് പ്രതി സ്വപ്ന സുരേഷിന്റെ മൊഴി ശുദ്ധ അസംബന്ധമെന്ന് സ്പീക്കർ പി ശ്രീരാമകൃഷ്ണൻ. ഇക്കാര്യം ആർക്കും അന്വേഷിച്ച് ബോധ്യപ്പെടാവുന്നതാണെന്നും അദ്ദേഹം വ്യക്തമാക്കി. പ്രവാസികളെ കാണുന്നതിന്റെ പേരിൽ നിക്ഷേപമുണ്ടെന്ന് വ്യാഖ്യാനിക്കുന്നത് അബദ്ധമാണെന്നും അദ്ദേഹം പറഞ്ഞു.

വിദേശത്ത് വിദ്യാഭ്യാസ സ്ഥാപനം തുടങ്ങാൻ തീരുമാനിച്ചെന്നും അതിൽ നിക്ഷേപം ഉണ്ടെന്നും പറയുന്ന മൊഴി തീർത്തും അടിസ്ഥാ വിരുദ്ധമാണ്. ഒമാനിൽ നല്ലനിലയിൽ വിദ്യാഭ്യാസ സ്ഥാപനം നടത്തുന്ന പൊന്നാനി സ്വദേശി ലഫീർ അഹമ്മദിനെ അറിയാം. തനിക്കവിടെ നിക്ഷേപമുണ്ടെന്ന് പറയുന്നത് ദുർവ്യാഖ്യാനം ചെയ്യലാണെന്നും ശ്രീരാമകൃഷ്ണൻ പറഞ്ഞു. പുതുതായി വന്ന മൊഴി അന്വേഷണത്തിന് വിധേയമാക്കണം. രാഷ്ട്രീയ താൽപര്യം വെച്ചുള്ള പ്രചാരകരുടെ വേഷത്തിലാണ് കേന്ദ്ര ഏജൻസികൾ പ്രവർത്തിക്കുന്നതെന്നും ശ്രീരാമകൃഷ്ണൻ പറയുന്നു.

ഷാർജാ ഷെയ്ഖിനെ കേരളത്തിനകത്തു നിന്നോ പുറത്തുനിന്നോ ഒറ്റയ്ക്ക് ഇതുവരെ അടുത്തു കാണാൻ സാധിച്ചിട്ടില്ല. കേരള സന്ദർശന വേളയിൽ ഔദ്യോഗികമായി അത്താഴ വിരുന്നിൽ പങ്കെടുത്തെന്നല്ലാതെ മറ്റൊന്നും ഉണ്ടായിട്ടില്ലെന്നും സ്പീക്കർ പറഞ്ഞു.

മാസങ്ങളായി അന്വേഷണ ഏജൻസിയുടെ കസ്റ്റഡിയിലുള്ള പ്രതി ഇതിനോടകം എട്ടോളം മൊഴികൾ നൽകിയിട്ടുണ്ട്. ഇപ്പോൾ പുതിയ കെട്ടുകഥകൾ ഉണ്ടാക്കുന്നത് ആരുടെ പ്രേരണയാലാണെന്ന് അറിയില്ലെന്നും അദ്ദേഹം പറഞ്ഞു. തെരഞ്ഞെടുപ്പ് കാലത്ത് കെട്ടുകഥകൾ ചമച്ച് രാഷ്ട്രീയ ലക്ഷ്യത്തോടെ നടത്തുന്ന നീക്കങ്ങൾ അംഗീകരിക്കാനാവില്ലെന്നും ശ്രീരാമകൃഷ്ണൻ വ്യക്തമാക്കി.

LEAVE A REPLY

Please enter your comment!
Please enter your name here