ന്യൂഡൽഹി: സംവരണം 50 ശതമാനം കടക്കാമെന്ന് കേരളം സുപ്രീംകോടതിയിൽ. മറാഠ സംവരണ കേസിൽ വാദം കേൾക്കുന്നതിനിടയിലാണ് കേരളം സുപ്രീംകോടതിയെ നിലപാടറിയിച്ചത്. സർക്കാർ ജോലികളിലും വിദ്യാഭ്യാസ സ്ഥാപനങ്ങളിലെ പ്രവേശനങ്ങളിലും സംവരണം അമ്പത് ശതമാനം കടക്കരുതെന്ന ഇന്ദിര സാഹ്നി കേസിലെ വിധി പുനഃപ്പരിശോധിക്കണമെന്നും കേരളം ആവശ്യപ്പെട്ടു.

നിലവിൽ സാമ്പത്തിക പിന്നോക്കാവസ്ഥയും കേരളത്തിൽ സംവരണത്തിന് ഘടകമാണ്. സംവരണ വിഷയങ്ങളിൽ തീരുമാനമെടുക്കാനുള്ള അധികാരം സംസ്ഥാനങ്ങൾക്ക് ആയിരിക്കണമെന്നും കേരളം സുപ്രീംകോടതിയിൽ വാദിച്ചു.

സുപ്രീംകോടതി ഭരണഘടനാ ബെഞ്ച് 1992-ൽ ഇന്ദിരാ സാഹ്നി കേസിൽ വിധി പറഞ്ഞപ്പോൾ സാമൂഹിക പിന്നോക്കാവസ്ഥ മാത്രമായിരുന്നു സംവരണത്തിനായി പരിഗണിച്ചിരുന്ന ഘടകം. എന്നാൽ ആ വിധിക്ക് ശേഷം കാലം മാറി. എന്നാൽ സാമ്പത്തിക പിന്നോക്കാവസ്ഥയും സംവരണത്തിനുള്ള ഘടകമാണെന്ന് കേരളത്തിനു വേണ്ടി ഹാജരായ മുതിർന്ന അഭിഭാഷകൻ ജയദീപ് ഗുപ്ത വ്യക്തമാക്കി.

സാമ്പത്തിക പിന്നോക്കാവസ്ഥയുമായി ബന്ധപ്പെട്ട സംവരണം ഇന്ദിര സാഹ്നി കേസിൽ വ്യക്തമാക്കിയ അമ്പത് ശതമാനത്തിൽ വരുന്നതല്ല. അതിനാൽ ഇന്ദിരാ സാഹ്നി കേസ് പുനഃപരിശോധിക്കാൻ ഉയർന്ന ബെഞ്ചിനു വിടണമെന്നും കേരളം ആവശ്യപ്പെട്ടിട്ടുണ്ട്. സംവരണ വിഭാഗങ്ങളെ നിശ്ചയിക്കുന്നതിനുള്ള 102-ാം ഭരണ ഭേദഗതിയിലെ വ്യവസ്ഥകളേയും കേരളം എതിർത്തു. ഉദ്യോഗസ്ഥ തലത്തിനു മുന്നിൽ തീരുമാനിക്കേണ്ട ഒന്നല്ല സംവരണം. നിയമ നിർമ്മാണ സഭകൾക്കും ജനപ്രതിനിധികൾക്കുമാണ് സംവരണം തീരുമാനിക്കാനുള്ള അധികാരമെന്നും കേരളം വാദിച്ചു. മാതൃഭൂമി റിപ്പോർട്ട് ചെയ്തു.

LEAVE A REPLY

Please enter your comment!
Please enter your name here