മലപ്പുറം: പ്രധാനമന്ത്രി നരേന്ദ്രമോദി വിദ്വേഷവും പകയും വളർത്തുന്ന തിരക്കിലാണെന്ന് രാഹുൽ ഗാന്ധി. എവിടെയെല്ലാം ചെന്ന് വിദ്വേഷം പരത്താൻ കഴിയുമോ അവിടെയെല്ലാം പോയി മോദി വിദ്വേഷം പരത്തുകയാണ്. പൗരത്വ നിയമം നടപ്പാക്കാൻ അനുവദിക്കില്ലെന്നും രാഹുൽ ചൂണ്ടിക്കാട്ടി. ഏറനാട് മണ്ഡലത്തിലെ യുഡിഎഫ് സ്ഥാനാർഥി പി കെ ബഷീറിൻ്റെ പ്രചാരണ പരിപാടിയുടെ ഭാഗമായി നടത്തിയ റോഡ് ഷോയിൽ സംസാരിക്കുകയായിരുന്നു രാഹുൽ ഗാന്ധി.

പൗരത്വ നിയമത്തെ കുറിച്ച് എല്ലാവർക്കും ആശങ്ക ഉണ്ടാകും. നിങ്ങൾ ആശങ്കപ്പെടേണ്ട. ഒരു കാരണവശാലും പൗരത്വ നിയമം നടപ്പാക്കാൻ സമ്മതിക്കില്ല. അത് ആലോചിച്ച് ആരും വിഷമിക്കേണ്ട കാര്യമില്ല. പൗരത്വ നിയമം നടപ്പാക്കാൻ അനുവദിക്കില്ലെന്ന് അസമിലും ഞാൻ പറഞ്ഞിട്ടുണ്ട്. അതേപോലെ ഇവിടെയും പറയുന്നു, പൗരത്വ നിയമം നടപ്പാക്കാൻ അനുവദിക്കില്ല.’- രാഹുൽ ഗാന്ധി പറഞ്ഞു.

യുഡിഎഫിന് അധികാരം ലഭിക്കുകയാണെങ്കിൽ എന്തൊക്കെ ചെയ്യണമെന്ന വ്യക്തമായ പ്ലാനിങ്ങുണ്ട്. വയനാട് ലോക്സഭാ മണ്ഡലത്തിൽ വിനോദസഞ്ചാരം വർധിപ്പിക്കുന്നതിനു വേണ്ടി മികച്ച പദ്ധതികൾ കൊണ്ടുവരും. വയനാടിനെ വിനോദസഞ്ചാര കേന്ദ്രമായി മാറ്റാനാണ് ആലോചിക്കുന്നത്. കേരളത്തിൽ ഐക്യജനാധിപത്യമുന്നണി അധികാരത്തിൽ വരേണ്ടതുണ്ട്. ന്യായ് പദ്ധതിയിലൂടെ പാവപ്പെട്ട ജനങ്ങൾക്ക് വ്യക്തമായ ഒരു വരുമാനം ഉണ്ടാകും. കേരളത്തിലെ ദാരിദ്ര്യം ഈ പദ്ധതിയിലൂടെ ഇല്ലാതാക്കാൻ കഴിയുമെന്നും രാഹുൽ ഗാന്ധി പറഞ്ഞു.

LEAVE A REPLY

Please enter your comment!
Please enter your name here