പൂനെ: രാജ്യത്ത് ജനുവരി 16ന് വാക്സിൻ വിതരണത്തിന് തുടക്കം കുറിക്കുന്നതിനു മുന്നോടിയായി ആദ്യ ലോഡ് വാക്സിൻ പൂനെയിലെ സിറം ഇൻസ്റ്റിറ്റ്യൂട്ട് ഓഫ് ഇന്ത്യയിൽ നിന്ന് പുറപ്പെട്ടു. പ്രത്യേക പൂജകള്‍ക്കു ശേഷം മൂന്ന് ശീതീകരിച്ച ട്രക്കുകളിലായാണ് ആദ്യ ലോഡ് വാക്സിനുകള്‍ രാജ്യത്തെ ഏറ്റവും വലിയ വാക്സിൻ നിര്‍മാണശാലയിൽ നിന്ന് പുറപ്പെട്ടത്. തിങ്കളാഴ്ച രാത്രിയോടെയാണ് വാക്സിൻ ലോഡുകള്‍ പുറപ്പെട്ടു തുടങ്ങിയത്. ചൊവ്വാഴ്ച രാവിലെയോടെ ആദ്യ ലോഡ് വാക്സിൻ പൂനെ വിമാനത്താവളത്തിൽ നിന്ന് ഡൽഹിയിലേയ്ക്ക് പുറപ്പെട്ടു.

പൂനെ വിമാനത്താവളത്തിൽ നിന്ന് പ്രത്യേക കാര്‍ഗോ വിമാനങ്ങളിൽ വാക്സിൻ രാജ്യത്തെ വിവിധ കേന്ദ്രങ്ങളിൽ സുരക്ഷിതമായി എത്തിക്കും. ഈ വാക്സിൻ വിവിധ സംസ്ഥാനങ്ങളിലെ ജില്ലാ കേന്ദ്രങ്ങളിലേയ്ക്കും ഇവിടങ്ങളിൽ നിന്ന് വാക്സിൻ വിതരണകേന്ദ്രങ്ങളിലേയ്ക്കും എത്തിക്കും. ചൊവ്വാഴ്ച മാത്രം എട്ടു വിമാനങ്ങളായി 13 ഇടത്തേയ്ക്കാണ് വാക്സിൻ അയച്ചത്. ഇന്നലെയാണ് കേന്ദ്രസര്‍ക്കാര്‍ സിറം ഇൻസ്റ്റിറ്റ്യൂട്ട് ഓഫ് ഇന്ത്യയുമായി ഔദ്യോഗികമായി കരാറൊപ്പിട്ടത്. ഒരു ഡോസിന് 200 രൂപ എന്ന നിരക്കിൽ 1.1 കോടി ഡോസ് വാക്സിൻ നല്‍കാനായാണ് കരാര്‍.

പൂനെയിലെ നിര്‍മാണകേന്ദ്രത്തിൽ നിന്ന് സര്‍ക്കാര്‍ കണ്ടെത്തിയിട്ടുള്ള 48 സംഭരണകേന്ദ്രങ്ങളിലേയ്ക്ക് വാക്സിൻ എത്തിക്കാൻ കൂള്‍ എക്സ് കോള്‍ഡ് ചെയിൻ ലിമിറ്റഡാണ് കരാറെടുത്തിട്ടുള്ളത്. ചെന്നൈയും ഹൈദരാബാദും കേന്ദ്രീകരിച്ചായിരിക്കും ദക്ഷിണേന്ത്യയിൽ വാക്സിൻ വിതരണം നടത്തുക. ആദ്യഘട്ടത്തിൽ രാജ്യത്തെ ഒരു കോടി ആരോഗ്യപ്രവര്‍ത്തകര്‍ക്കും 2 കോടി മുൻനിര പ്രവര്‍ത്തകര്‍ക്കുമാണ് വാക്സിൻ നല്‍കുന്നത്. ഈ ഘട്ടത്തിൽ വാക്സിൻ വിതരണം സൗജന്യമായിരിക്കും. ഇതിനു ശേഷം മുൻഗണനാ പട്ടികയിലുള്ള 27 കോടി പേര്‍ക്ക് വാക്സിൻ ലഭ്യമാക്കും.

കേരളത്തിൽ ആദ്യഘട്ടത്തിൽ മൂന്നര ലക്ഷത്തോളം ആരോഗ്യപ്രവര്‍ത്തകര്‍ വാക്സിനായി രജിസ്റ്റര്‍ ചെയ്തിട്ടുണ്ടെന്ന് സംസ്ഥാന സര്‍ക്കാര്‍ വ്യക്തമാക്കിയിട്ടുള്ളത്. എല്ലാ ജില്ലകളിലുമായി സംസ്ഥാനത്ത് 133 വാക്സിൻ വിതരണകേന്ദ്രങ്ങളാണ് ഒരുക്കിയിട്ടുള്ളത്. സംസ്ഥാനത്ത് എല്ലാവര്‍ക്കും കൊവിഡ് വാക്സിൻ സൗജന്യമായി ലഭ്യമാക്കുമെന്ന് മുഖ്യമന്ത്രി പിണറായി വിജയൻ പ്രഖ്യാപിച്ചിരുന്നു. എന്നാൽ രാജ്യത്ത് എല്ലാവര്‍ക്കും വാക്സിൻ സൗജന്യമാക്കുന്ന കാര്യത്തിൽ കേന്ദ്രസര്‍ക്കാര്‍ തീരുമാനമെടുത്തിട്ടില്ല. അതേസമയം, കൊവിഡ് വാക്സിൻ ജൂൺ മാസം മുതൽ പൊതുവിപണിയിൽ ലഭ്യമായേക്കുമെന്ന് ടൈംസ് ഓഫ് ഇന്ത്യ റിപ്പോര്‍ട്ട് ചെയ്യുന്നുണ്ട്. ഒരു ഡോസ് വാക്സിൻ ആയിരം രൂപ നിരക്കിലായിരിക്കും വിൽപന നടത്തുക.

LEAVE A REPLY

Please enter your comment!
Please enter your name here