ഹരിദ്വാർ: ഹരിദ്വാറിൽ കുംഭമേളയിൽ പങ്കെടുത്ത 30 സന്യാസിമാർക്ക് കൊവിഡ് സ്ഥിരീകരിച്ചു. സന്യാസിമാർക്കിടയിൽ ആർടി- പിസിആർ പരിശോധന പുരോഗമിക്കുകയാണെന്ന് ഹരിദ്വാർ ചീഫ് മെഡിക്കൽ ഓഫിസർ ഡോ. എസ് കെ ഝാ പറഞ്ഞു. ഏപ്രിൽ 17 മുതൽ പരിശോധന കൂടുതൽ വേഗത്തിലാക്കുമെന്നും അദ്ദേഹം അറിയിച്ചു. അതേസമയം കുംഭമേളയില്‍ നിന്ന് പിന്മാറുകയാണെന്ന സൂചന നിരഞ്ജനി അഖാഡ നൽകി.

13 അഖാഡകളാണ് കുംഭമേളയിൽ പങ്കെടുക്കുന്നത്. ഇതിൽ പ്രധാനപ്പെട്ട അഖാഡകളിലൊന്നാണ് നിരഞ്ജനി അഖാഡ. ശനിയാഴ്ചയോടെ കുംഭമേളയിൽ നിന്ന് പിന്മാറുമെന്നാണ് സന്യാസ സമൂഹം അറിയിച്ചതെന്ന് ഇംഗ്ളീഷ് വാർത്താ ചാനലായ എൻഡിടിവിയാണ് റിപ്പോർട്ട് ചെയ്തത്. കൊവിഡ് സ്ഥിരീകരിച്ച 30 സന്യസിമാർ ഏതെങ്കിലും ഒരു അഖാഡയിൽ നിന്നുള്ളതല്ലെന്നതും ശ്രദ്ധേയമാണ്. വിവിധ അഖാഡകളിലായുള്ള സന്യാസിമാർക്കാണ് കൊവിഡെന്നാണ് റിപ്പോർട്ട്.

“ഇതുവരെ 30 സന്യാസിമാർക്ക് കൊവിഡ്-19 സ്ഥിരീകരിച്ചു. ഏതെങ്കിലും ഒരു പ്രത്യേക അഖാഡയിലല്ല കേസുകൾ റിപ്പോർട്ട് ചെയ്തിരിക്കുന്നത്. നിരഞ്ജനി, ജുന തുടങ്ങി ഒട്ടുമിക്ക അഖാഡകളിലും കൊവിഡ് കേസുകളുണ്ട്” ഹരിദ്വാർ ചീഫ് മെഡിക്കൽ ഓഫീസർ പറഞ്ഞതായി എൻഡിടിവി റിപ്പോർട്ട് ചെയ്യുന്നു.

ഓൾ ഇന്ത്യ അഖാഡ പരിഷത്തിന്‍റെ നേതാവ് നരേന്ദ്ര ഗിരി കൊവിഡ് സ്ഥിരീകരിച്ച് ഋഷികേശിലെ എംയിസിൽ ചികിത്സയിലാണെന്നാണ് റിപ്പോർട്ടുകൾ വ്യക്തമാക്കുന്നത്. മധ്യപ്രദേശിൽ നിന്നുള്ള മഹാ നിർവാനി അഖാഡ അംഗമായ സ്വാമി കപിൽ ദേവ് കഴിഞ്ഞ ദിവസം കൊവിഡ് ബാധിച്ച് മരിക്കുകയും ചെയ്തിരുന്നു. ഡെറാഡൂണിലെ സ്വകാര്യ ആശുപത്രിയിൽ ചികിത്സയിലിരിക്കെയാണ് ഇദ്ദേഹം മരിച്ചത്. ഇതിന് പിന്നാലെയാണ് സന്യാസ സമൂഹങ്ങൾ കുംഭമേളയിൽ നിന്നുള്ള പിന്മാറാനുള്ള തീരുമാനത്തിലെത്തിയത്.

LEAVE A REPLY

Please enter your comment!
Please enter your name here