ബെംഗളൂരു: കൊവിഡ് വ്യാപന പശ്ചാത്തലത്തിൽ കർണാടകയിൽ കർശന നിയന്ത്രണങ്ങൾ ഏർപ്പെടുത്തി. 14 ദിവസത്തേക്ക് സംസ്ഥാനത്ത് കർഫ്യൂ പ്രഖ്യാപിച്ചതായി മുഖ്യമന്ത്രി ബിഎസ് യെദ്യൂരപ്പ അറിയിച്ചു. ചൊവ്വാഴ്ച രാത്രി ഒമ്പതു മുതല്‍ 14 ദിവസത്തേക്കാണ് കര്‍ഫ്യൂ പ്രഖ്യാപിച്ചിരിക്കുന്നത്. ഇന്ന് ചേർന്ന മന്ത്രിസഭാ യോഗത്തിലാണ് ഇതുസംബന്ധിച്ച് തീരുമാനമുണ്ടായത്.

അവശ്യ വസ്തുക്കൾ വിൽക്കുന്ന കടകൾക്ക് രാവിലെ 6 മണി മുതൽ രാവിലെ 10 മണി വരെ പ്രവർത്തിക്കാൻ അനുമതിയുണ്ട്. 10 മണിക്കു ശേഷം കടകള്‍ അടയ്ക്കണം. പൊതുഗതാഗ സംവിധാനങ്ങൾ ഉണ്ടാവുകയില്ല. കർണാടക ആർടിസി ബസുകളും, ബെംഗളൂരു മെട്രോ സർവീസും പ്രവർത്തിക്കില്ലെന്നും മുഖ്യമന്ത്രി വ്യക്തമാക്കി. അന്തർ സംസ്ഥാന ചരക്ക് ഗതാഗതത്തിന് അനുമതിയുണ്ട്.

അതേസമയം സംസ്ഥാനത്ത് നിര്‍മാണം, ഉത്പാദനം, കൃഷി എന്നീ മേഖലകള്‍ക്ക് നിയന്ത്രണമില്ല. സംസ്ഥാനത്ത് സർക്കാർ ആശുപത്രികളിൽ 18 വയസിന് മുകളിലുള്ളവർക്ക് വാക്സിൻ സൗജന്യമായി നൽകാനും ക്യാബിനറ്റ് യോഗത്തിൽ തീരുമാനമായി. കടകളും മറ്റും കൃത്യസമയത്ത് തന്നെ അടയ്ക്കണമെന്ന് പോലീസ് ഇടപെടലിലേക്ക് കാര്യങ്ങൾ എത്തിക്കരുതെന്നും മുഖ്യമന്ത്രി അഭ്യർഥിച്ചു.

സംസ്ഥാനത്ത് ഞായറാഴ്ച ഏറ്റവും ഉയർന്ന പ്രതിദിന കൊവിഡ് കേസുകളാണ് റിപ്പോർട്ട് ചെയ്തത്. ഈ സാഹചര്യത്തിലാണ് കർശന നിയന്ത്രണങ്ങൾ ഏർപ്പെടുത്തിയത്. 34,804 പുതിയ കൊവിഡ് കേസുകളാണ് കര്‍ണാടകയില്‍ റിപ്പോര്‍ട്ട് ചെയ്തത്. 143 മരണം കൂടി റിപ്പോര്‍ട്ട് ചെയ്തതോടെ സംസ്ഥാനത്തെ ആകെ മരണസംഖ്യ 14426 ആയി. ബെംഗളൂരുവിലും കൊവിഡ് വ്യാപനം ഉയർന്ന നിലയിലാണ്.

LEAVE A REPLY

Please enter your comment!
Please enter your name here