തിരുവനന്തപുരം: കൊവിഡ് നിയന്ത്രണത്തിൻ്റെ പേരിൽ രാത്രി 9 മണിയ്ക്ക് ശേഷം ഹോട്ടലുകള്‍ അടയ്ക്കണമെന്നത നിര്‍ദേശം പ്രായോഗികമല്ലെന്ന് ഹോട്ടൽ ആൻ്റ് റെസ്റ്റോറൻ്റ് അസോസിയേഷൻ. രോഗവ്യാപനത്തിന് ഉത്തരവാദികള്‍ വ്യാപാരികളല്ലെന്ന് വ്യക്തമാക്കിയ സംഘടന നിയന്ത്രണം 9 മണി എന്നത് 11 മണിയായി നീട്ടണമെന്നും ആവശ്യപ്പെട്ടു.

തെരഞ്ഞെടുപ്പ് കാലത്ത് രാഷ്ട്രീയക്കാരാണ് കൊവിഡ് 19 നിയന്ത്രണങ്ങള്‍ കാറ്റിൽ പറത്തിയത്. ഇങ്ങനെയാണ് രോഗവ്യാപനമുണ്ടായതെന്നും ഇതിന് വ്യാപാരികള്‍ ഉത്തരവാദികളല്ലെന്നും ഹോട്ടൽ ആൻ്റ് റെസ്റ്റോറൻറ് അസോസിയേഷൻ സംസ്ഥാന ജനറൽ സെക്രട്ടറി ജയപാൽ വ്യക്തമാക്കി.

സംസ്ഥാനത്ത് കൊവിഡ് 19 രണ്ടാം തരംഗം ശക്തമാകുന്ന സാഹചര്യത്തിലാണ് സര്‍ക്കാര്‍ കൂടുതൽ നിയന്ത്രണങ്ങള്‍ പ്രഖ്യാപിച്ചത്. രാത്രി 9 മണിയ്ക്ക് കടകള്‍ അടയ്ക്കണമെന്നും ബസുകളിൽ നിന്നു കൊണ്ടു യാത്ര പാടില്ലെന്നും സര്‍ക്കാര്‍ നിര്‍ദേശം നല്‍കിയിട്ടുണ്ട്. ഭക്ഷണശാലകളിൽ പ്രവേശിപ്പിക്കാവുന്ന ആളുകളുടെ എണ്ണത്തിനും പരിമിതിയുണ്ട്. ഇന്നു മുതലാണ് പുതിയ നിയന്ത്രണങ്ങള്‍ പ്രാബല്യത്തിൽ വരുന്നത്.

എന്നാൽ വ്യാപാര സ്ഥാപനങ്ങളുടെ സമയം നിയന്ത്രിച്ച സര്‍ക്കാര്‍ നടപടിയ്ക്കെതിരെയാണ് വ്യാപാരികളുടെ പ്രതിഷേധം. കഴിഞ്ഞ വര്‍ഷം കേന്ദ്രസര്‍ക്കാര്‍ ലോക്ക്ഡൗൺ പ്രഖ്യാപിച്ചതു വഴി രാജ്യത്ത് ചരിത്രത്തിലെ ഏറ്റവും വലിയ സാമ്പത്തിക മാന്ദ്യത്തിന് ഇടയാക്കിയിരുന്നു. പിന്നീട് ഘട്ടം ഘട്ടമായാണ് വിപണി തുറന്നു കൊടുത്തത്. എന്നാൽ വീണ്ടും കടുത്ത നിയന്ത്രണങ്ങള്‍ ഏര്‍പ്പെടുത്തുന്നത് മേഖലയിലെ പ്രതിസന്ധി വര്‍ധിപ്പിക്കുമെന്നാണ് വ്യാപാരികള്‍ വ്യക്തമാക്കുന്നത്.

LEAVE A REPLY

Please enter your comment!
Please enter your name here