കോഴിക്കോട്: വടകരയിലെ യുഡിഎഫ് സ്ഥാനാർഥി കെകെ രമയ്ക്കായി വോട്ടഭ്യർഥിച്ച് കോൺഗ്രസ് നേതാവ് രാഹുൽ ഗാന്ധി. പുറമേരിയിൽ നടന്ന തെരഞ്ഞെടുപ്പ് പ്രചാരണ യോഗത്തിലാണ് ഇടതുപക്ഷത്തിന് നേരെ ചോദ്യങ്ങളുമായി രാഹുൽ ഗാന്ധി രമയ്ക്കായി വോട്ട് ചോദിച്ചത്. രമയെ അടുത്തുനിർത്തി എന്തിനാണ് ഇവരുടെ ഭർത്താവിനെ കൊന്നുകളഞ്ഞതെന്ന് ഇടതുപക്ഷത്തോട് അദ്ദേഹം ചോദിച്ചതായി മലയാള മനോരമയാണ് റിപ്പോർട്ട് ചെയ്തത്. ടിപി ചന്ദ്രശേഖരന്‍റെയും രമയുടെയും മകനായ അഭിനന്ദ് എടുത്ത ചിത്രം രാഹുൽ ഗാന്ധി ഫേസ്ബുക്കിൽ പങ്കുവയ്ക്കുകയും ചെയ്തു. രാഹുലിന്‍റെ വാക്കുകളും വടകരയിലെ തെരഞ്ഞെടുപ്പ് സാധ്യതകളും അറിയാം.

എന്തിനാണ് ഇവരുടെ ഭർത്താവിനെ നിങ്ങൾ കൊന്നുകളഞ്ഞതെന്ന് ചോദിച്ച രാഹുൽ ഗാന്ധി ഇവർക്കു വേദന നൽകിയതിലൂടെ നിങ്ങൾ എന്തു നേടിയെന്നും ചോദിച്ചതായി മനോരമ റിപ്പോർട്ട് ചെയ്യുന്നു. ‘മകനിൽ നിന്ന് അച്ഛനെ അടർത്തിയെടുത്തിട്ടു നിങ്ങൾക്ക് എന്തു നേട്ടമാണുണ്ടായത്? എല്ലാറ്റിനുമുപരി അവരും ഇടതുപക്ഷ കുടുംബത്തിലെ അംഗങ്ങളായിരുന്നില്ലേ?’ രാഹുൽ ചോദിച്ചു. ഇടതുപ്രത്യയശാസ്ത്രത്തിന്‍റെ ഇരകളായി കൊല്ലപ്പെട്ട ആയിരക്കണക്കിനു രക്തസാക്ഷികളുടെ കുടുംബത്തിന്‍റെ പ്രതീകമാണ് കെകെ രമയെന്നും തെരഞ്ഞെടുപ്പ് കൺവെൻഷൻ ഉദ്ഘാടനം ചെയ്ത് രാഹുൽ പറഞ്ഞതായി റിപ്പോർട്ട് ചൂണ്ടിക്കാട്ടുന്നു.

നിലവിൽ ഇടതുപക്ഷത്തിന്‍റെ കൈയ്യിലാണ് വടകര മണ്ഡലം. ജെഡിഎസ് നേതാവ് സികെ നാണുവാണ് എംഎൽഎ. 2016ൽ എതിർ സ്ഥാനാർഥിയായിരുന്ന മനയത്ത് ചന്ദ്രന്‍റെ എൽജെഡിയും ഇപ്പോൾ ഇടതുപക്ഷത്തിനൊപ്പമാണ്. എന്നാൽ വടകരയിൽ ജനപിന്തുണയുള്ള ആർഎംപി യുഡിഎഫിനൊപ്പം ചേർന്ന് മത്സരിച്ചതോടെയാണ് ഇവിടെ മത്സരഫലം പ്രവചനാതീതമായത്. കഴിഞ്ഞതവണ ഒറ്റയ്ക്ക് മത്സരിച്ച് മൂന്നാമതെത്തിയ പാർട്ടിയായിരുന്നു ആർഎംപി.

ജെഡിഎസും എൽജെഡിയും രണ്ട് മുന്നണികളിലായിരിക്കെയാണ് 2016ലെ നിയമസഭാ തെരഞ്ഞെടുപ്പ് നടക്കുന്നത്. എൽജെഡി അന്ന് ജെഡിയു ആയിരുന്നു. ഇടതുപക്ഷത്തിനായി ജെഡിഎസിലെ സികെ നാണുവും വലതുപക്ഷത്തിനായി ഇന്നത്തെ എൽജെഡിയിലെ മനയത്ത് ചന്ദ്രനുമാണ് മത്സരിച്ചത്. ബിജെപിയ്ക്കായി എം രാജേഷ് കുമാറും മത്സരത്തിനിറങ്ങി. എന്നാൽ ബിജെപിയേക്കാൾ വടകരയിൽ സ്വാധീനമുള്ള ആർഎംപിയ്ക്കും വടകരയിൽ സ്ഥാനാർഥിയുണ്ടായിരുന്നു. ടിപി ചന്ദ്രശേഖരന്‍റെ ഭാര്യ കെകെ രമ. തെരഞ്ഞെടുപ്പ് ഫലം പുറത്തുവന്നപ്പോൾ സികെ നാണു 9,511 വോട്ടിന് വിജയിച്ചു. മനയത്ത് ചന്ദ്രൻ രണ്ടാമതും കെകെ രമ മൂന്നാമതും എത്തി. ബിജെപി സ്ഥാനാർഥി നാലാം സ്ഥാനത്തേക്ക് പിന്തള്ളപ്പെട്ടു.

2016ലെ നിയമസഭ തെരഞ്ഞെടുപ്പിൽ ഒരു മുന്നണിയുടെയും ഭാഗമാകാതെയായിരുന്നു ആർഎംപി തെരഞ്ഞെടുപ്പിനെ നേരിട്ടത്. സികെ നാണുവിന് 49,211 വോട്ടുകളും മനയത്ത് ചന്ദ്രന് 39,700 വോട്ടുകളും ലഭിച്ചപ്പോൾ കെകെ രമ 20,504 വോട്ടുകളുമായി തങ്ങളുടെ ശക്തി തെളിയിച്ചു. ഇത്തവണ യുഡിഎഫിന്‍റെ ഭാഗമായി രമ ജനവിധി നേടുമ്പോൾ മണ്ഡലം തങ്ങൾക്ക് അനുകൂലമാകുമെന്ന പ്രതീക്ഷയിലാണ് നേതൃത്വം. ജെഡിഎസും എൽജെഡിയും ഒരു മുന്നണിയുടെ ഭാഗമായി തെരഞ്ഞെടുപ്പിനെ നേരിടുമ്പോൾ ആർഎംപി സ്ഥാനാർഥിയിലൂടെ മണ്ഡലം നേടാനാണ് യുഡിഎഫ് ഒരുങ്ങുന്നത്.

LEAVE A REPLY

Please enter your comment!
Please enter your name here