കൊച്ചി: വിവാഹവും ആഘോഷവും മാത്രമല്ല ഇന്ത്യൻ ജ്വല്ലറി പരസ്യങ്ങൾ ഇപ്പോൾ സമൂഹത്തിലെ ചില വിഷയങ്ങൾ കൂടി ഉയർത്തിക്കാട്ടുന്നുണ്ട്. അതിന് ഉത്തര ഉദാഹരണമാണ് കഴിഞ്ഞദിവസം പുറത്തിറങ്ങിയ ഭീമ ജ്വല്ലറിയുടെ പരസ്യം. സാധാരണ ജ്വല്ലറി പരസ്യത്തിൽനിന്നും ഏറെ വ്യത്യസ്തമായി ഒരു ട്രാൻസ്ജെന്ററുടെ ജീവിതം പശ്ചാത്തലമാക്കിയാണ് ഭീമയുടെ പരസ്യം. ‘സ്‌നേഹം പോലെ പരിശുദ്ധം’ എന്ന ടാഗ്‌ലൈനോടുകൂടിയാണ് ഭീമ പരസ്യം പുറത്തിറക്കിയത്. കാഴ്ചക്കാരുടെ കണ്ണും മനസ്സും നിറയ്ക്കുന്ന ഭീമയുടെ പുതിയ പരസ്യത്തിന് വൻ കയ്യടിയാണ് സോഷ്യൽ മീഡിയയിൽ ലഭിക്കുന്നത്.

ആൺഉടലിൽ പെൺമനസുമായി ജീവിക്കുന്ന വ്യക്തിയെയും അദ്ദേഹത്തിന്റെ ജീവിതത്തെയും മാതാപിതാക്കൾ അംഗീകരിക്കുന്നതാണ് പരസ്യത്തിന്‍റെ ഉള്ളടക്കം. യഥാർഥ സ്നേഹം എന്നത് ഒരാളെ അയാളായി തന്നെ അംഗീകരിക്കാനുള്ള മനസാണ് എന്നതും പരസ്യം പറ‍ഞ്ഞ് വയ്ക്കുന്നു. നടി പാർവതി തിരുവോത്ത് ഉൾപ്പടെ പരസ്യത്തെ അഭിനന്ദിച്ച് രംഗത്തെത്തി. പരസ്യം തന്നെ ഏറെ സ്പർശിച്ചുവെന്നും ഭീമയ്ക്ക് കൈയടികൾ നൽകുന്നുവെന്നും പാർവതി തന്റെ ഇൻസ്റ്റഗ്രാം സ്‌റ്റോറിയിൽ കുറിച്ചു.

രഞ്ജു രഞ്ജിമാരടക്കം നിരവധി ട്രാൻസ് വ്യക്തികൾ ഭീമയ്ക്ക് അഭിനന്ദനം അറിയിച്ച് പോസ്റ്റും കമന്റുകളും പങ്കുവയ്ക്കുന്നുണ്ട്. യുടൂബേർസായ ഗായത്രി, കീർത്തി മാധവൻ തുടങ്ങി നിരവധി പേർ പരസ്യത്തെ അഭിനന്ദിച്ചു. ഭീമയിൽനിന്ന് ഇത്തരത്തിലുള്ളൊരു പരസ്യം പുറത്തുവന്നതിൽ വളരെ സന്തോഷമുണ്ടെന്ന് ഗായത്രി കുറിച്ചു. ഡൽഹി ആസ്ഥാനമായുള്ള സ്വതന്ത്ര പരസ്യ ഏജൻസിയായ ‘അനിമൽ’ ആണ് പരസ്യം നിർമ്മിച്ചത്. ഒരു മിനിറ്റ് 42 സെക്കന്റ് ദൈർഘ്യമുള്ള പരസ്യച്ചിത്രം ഭാരത് സിക്കയാണ് സംവിധാനം ചെയ്തത്. ട്രാൻസ് വുമൺ മീര സിങ്കാനിയ ആണ് പരസ്യത്തിലെ മുഖ്യവേഷം അവതരിപ്പിച്ചത്.

LEAVE A REPLY

Please enter your comment!
Please enter your name here