രാജ്യത്തെ പൊതുമേഖലാ സ്ഥാപനമായ ബി‌എസ്‌എൻ‌എല്ലിന്റെ പുതിയ ഓഫറുകളുടെ കാലാവധി നീട്ടി. ഏപ്രില്‍ 3 വരെ പുതുക്കിയ ഓഫറുകള്‍ ഉപയോക്താക്കള്‍ക്ക് ലഭ്യമാക്കുമെന്ന് ബിഎസ്എൻഎൽ അറിയിച്ചു. പ്രതിമാസം 449 രൂപ നിരക്കില്‍ 30 എംബിപിഎസ് വേഗതയില്‍ 3,300 ജിബി ഇന്റര്‍നെറ്റ് ലഭിക്കുന്ന ഫൈബര്‍ ബേസിക് പ്ലാന്‍ സബ്‌സ്‌ക്രൈബ് ചെയ്യുവാനുള്ള സമയപരിധിയാണ് ബിഎസ്എന്‍എല്‍ നീട്ടി നല്‍കിയത്.

കഴിഞ്ഞ വര്‍ഷം ഒക്ടോബര്‍ മാസത്തിലാണ് ബിഎസ്എന്‍എല്‍ പുതിയ ബ്രോഡ്ബാന്‍ഡ് പ്ലാനുകള്‍ അവതരിപ്പിച്ചത്. ഡിസംബര്‍ 29 വരെയായിരുന്നു പ്ലാനുകളുടെ കാലാവധി നിശ്ചയിച്ചിരുന്നത്. എന്നാല്‍ 449 രൂപ, 799 രൂപ, 999 രൂപ, 1499 രൂപ നിരക്കിലുള്ള ഭാരത് ഫൈബര്‍ പ്ലാനുകളുടെ വാലിഡിറ്റി ജനുവരി 4 മുതല്‍ 90 ദിവസത്തേക്ക് കൂടി നീട്ടിയിട്ടുണ്ട്. 449 രൂപ പ്ലാനില്‍ 3,300 ജിബിക്കു ശേഷം സ്പീഡ് 2 എംബിപിഎസ് ആകും. ഇപ്പോള്‍ 449 രൂപ പ്ലാനില്‍ പ്രതിവര്‍ഷ സബ്സ്‌ക്രിപ്ഷന്‍ നല്‍കുന്നില്ല.

പ്രമോഷണല്‍ അടിസ്ഥാനത്തില്‍ നല്‍കുന്ന ഈ പ്ലാന്‍ പുതിയ ബ്രോഡ്ബാന്‍ഡ് ഉപഭോക്താക്കള്‍ക്ക് മാത്രമേ ലഭ്യമാവുകയുള്ളൂ. 449 രൂപ പ്ലാന്‍ തിരഞ്ഞെടുക്കുന്ന ഉപഭോക്താക്കളെ 6 മാസത്തിന് ശേഷം 60 എംബിപിഎസ് ഡേറ്റ നല്‍കുന്ന ഫൈബര്‍ ബേസിക് പ്ലസ് 599 പ്ലാനിലേക്ക് സ്വപ്രേരിതമായി മൈഗ്രേറ്റ് ചെയ്യുന്ന രീതിയാണുള്ളത്. ഒരു മാസം സൗജന്യ സേവനം ലഭിക്കും.

കേരളത്തില്‍ തിരുവനന്തപുരം, എറണാകുളം നഗരങ്ങളില്‍ മാത്രമാണ് ഈ പ്ലാനുകള്‍ ലഭിച്ചിരുന്നത്. എന്നാല്‍ ഇപ്പോള്‍ മറ്റു ചില നഗരങ്ങളിലും ലഭ്യമാകുന്നുണ്ട്. ആന്‍ഡമാന്‍ നിക്കോബാര്‍ ദ്വീപുകളില്‍ ഒഴികെ ബിഎസ്എന്‍എല്ലിന്റെ ഫൈബര്‍ ബേസിക് പ്ലസ് പ്ലാന്‍ രാജ്യത്തെ എല്ലാ സര്‍ക്കിളുകളിലും ലഭിക്കുന്നുണ്ട്. ഈ ഓഫറില്‍ ഇന്ത്യയിലെ ഏത് നെറ്റ്‍വര്‍ക്കിലേക്കും പരിധിയില്ലാത്ത ലോക്കല്‍, എസ്ടിഡി കോളുകള്‍ ലഭിക്കും.

LEAVE A REPLY

Please enter your comment!
Please enter your name here