വിജയ് ബാബുവിന്റെ പാസ്‌പോര്‍ട്ട് റദ്ദാക്കി, നടന്‍ എവിടെയെന്ന വ്യക്തത ഇപ്പോഴുമില്ല

May 20, 2022

കൊച്ചി | യുവ നടിയെ പീഡിപ്പിച്ച കേസിലെ പ്രതി, നടനും നിര്‍മാതാവുമായ വിജയ് ബാബുവിന്റെ പാസ്പോര്‍ട്ട് വിദേശകാര്യ മന്ത്രാലയം റദ്ദാക്കി. കൊച്ചി സിറ്റി പോലീസിന്റെ അപേക്ഷയിലാണ് നടപടി. പാസ്പോര്‍ട്ട് റദ്ദായതോടെ അതോടൊപ്പമുള്ള വിസയും റദ്ദാകുമെന്ന് സിറ്റി പോലീസ് കമ്മിഷണര്‍ സി.എച്ച്. നാഗരാജു വ്യക്തമാക്കി. പാസ്പോര്‍ട്ട് റദ്ദായ കാര്യം ഇന്ത്യന്‍ എംബസി മുഖാന്തരവും ഇന്റപോള്‍ വഴിയും യു.എ.ഇയെ അറിയിക്കും. ഈ സാഹചര്യത്തില്‍ വിജയ് ബാബുവിനെ യു.എ.ഇ. പോലീസ് പിടികൂടി നാട്ടിലേക്ക് തിരിച്ചയക്കുമെന്നാണ് പ്രതീക്ഷിക്കുന്നത്. അതേസമയം വിജയ് ബാബു ഇപ്പോഴും യു.എ.ഇയിലുണ്ടോയെന്ന കാര്യത്തില്‍ പോലീസിനും വ്യക്തതയില്ല. കേസുകളില്‍ പ്രതികളായവരെ കൈമാറ്റം ചെയ്യാനുള്ള കരാറില്ലാത്ത മറ്റൊരു രാജ്യത്തേക്ക് കഴിഞ്ഞ ദിവസം ഇയാള്‍ കടന്നതായും സൂചനയുണ്ട്.

ജിറ്റാമാസിനെ ഇടിച്ചിട്ടു നിഖാത് സരിന്‍ സ്വര്‍ണം നേടി, ഇന്ത്യയ്ക്കു നേട്ടം

May 20, 2022

ഇസ്താംബുള്‍ | വനിതാ ബോക്‌സിംഗ് ലോകചാമ്പ്യന്‍ഷിപ്പില്‍ ഇന്ത്യയുടെ നിഖാത് സരീനു സ്വര്‍ണം. തായ്‌ലന്‍ഡിന്റെ ജിറ്റ്‌പോങ്് ജിറ്റാമാസിനെയാണ് ഫൈനലില്‍ സരീന്‍ ഇടിച്ചിട്ടത്. 52 കിലോ വിഭാഗത്തിലാണ് സരീന്റെ സ്വര്‍ണ നേട്ടം. വനിതാ ലോകചാമ്പ്യന്‍ഷിപ്പില്‍ സ്വര്‍ണം അണിയുന്ന അഞ്ചാമത്തെ ഇന്ത്യന്‍ താരമാണ് സരീന്‍. നേരത്തെ മേരി കോം (ആറു വട്ടം), സരീതാ ദേവി, ജെന്നി ആര്‍.എല്‍, ലേഖ കെ.സി എന്നിവരും ലോകചാമ്പ്യന്‍ഷിപ്പുകളില്‍ സ്വര്‍ണം സ്വന്തമാക്കിയിട്ടുണ്ട്.

ദുരൂഹത… നെടുമ്പാശ്ശേരിയില്‍ നിന്നു അപ്രത്യക്ഷനായ പ്രവാസി മരിച്ചു, ആശുപത്രിയിലെത്തിച്ചത് രക്തം വാര്‍ന്ന മുറിവുകളുമായി

May 20, 2022

പാലക്കാട് | നെടുമ്പാശ്ശേരി വിമാനത്താവളത്തിലെത്തിയശേഷം ദുരൂഹ സാഹചര്യത്തില്‍ അപ്രത്യക്ഷനായ പ്രവാസി, അഗളി സ്വദേശി മരിച്ചു. വെട്ടേറ്റ് രക്തം വാര്‍ന്നു വഴിയരികില്‍ കിടന്ന അഗളി വാക്യത്തൊടി അബ്ദുള്‍ ജലീലിനെ(42) കഴിഞ്ഞ ദിവസം പെരിന്തല്‍മണ്ണയിലെ സ്വകാര്യ ആശുപത്രിയിലെത്തിച്ചിരുന്നു.

നെടുമ്പാശേരിയില്‍ നിന്നു അപ്രത്യക്ഷനായി നാലാം ദിനത്തിലാണ് അബോധാവസ്ഥയില്‍ ഇയാളെ കണ്ടെത്തിയത്. ആശുപത്രിയില്‍ എത്തിച്ച വിവരം നെറ്റ് കോളിലൂടെ ഒരാള്‍ ഭാര്യയെ വിളിച്ച് അറിയിക്കുകയായിരുന്നു. ജിദ്ദയില്‍ ഹൗസ് ഡ്രൈവറായി ജോലി ചെയ്യുന്ന ജലീല്‍ 15നു രാവിലെയാണ് നെടുമ്പാശ്ശേരി വിമാനത്താവളത്തില്‍ എത്തിയത്.

സുഹൃത്തിനൊപ്പം പെരിന്തല്‍മണ്ണയിലേക്കു എത്തുമെന്ന് ജലീല്‍ അറിയിച്ചതിനെ തുടര്‍ന്ന് ഭാര്യയും ഉമ്മയും അവിടെയെത്തി. എന്നാല്‍, വൈകുമെന്നും വീട്ടിലേക്കു മടങ്ങിക്കൊള്ളാനും ജലീല്‍ അറിയിക്കുകയായിരുന്നുവെന്ന് ബന്ധുക്കള്‍ പറയുന്നു. അടുത്ത ദിവസം വരെ കാത്തിരുന്നിട്ടും ജലീല്‍ വീട്ടിലെത്തിയില്ല. 16നു രാത്രി അവസാനമായി ഭാര്യയെ വിളിക്കുമ്പോള്‍ അടുത്ത ദിവസം എത്തുമെന്നും പോലീസില്‍ പരാതി നല്‍കിയിട്ടുണ്ടെങ്കില്‍ പിന്‍വലിക്കണമെന്നും ജലീല്‍ പറഞ്ഞിരുന്നുവെന്നാണ് റിപ്പോര്‍ട്ട്.

ചക്രവാതച്ചുഴി, ന്യൂനമര്‍ദ പാത്തി: കനത്ത മഴ തുടരും, മുന്നറിയിപ്പ്

May 19, 2022

News Update
- എറണാകുളം, തൃശൂര്‍ ജില്ലകളില്‍ അതിശക്തമായ മഴയ്ക്കു സാധ്യതയുണ്ട്. മധ്യകേരളത്തിലും വടക്കന്‍ കേരളത്തിലും കനത്ത മഴയാണ് മണിക്കൂറുകളായി പെയ്യുന്നത്. രാത്രിയില്‍ മഴ കനത്തതോടെയാണ് കൊച്ചി നഗരത്തിന്റെ പല ഭാഗങ്ങളും വെള്ളത്തിലായത്. എം.ജി. റോഡ്, കല്ലൂര്‍, സൗത്ത് റെയില്‍വേ സ്‌റ്റേഷന്‍ റോഡ് എന്നിവിടങ്ങളില്‍ വലിയ വെള്ളക്കെട്ടാണ് രൂപപ്പെട്ടത്. ഇടപ്പള്ളി ടോള്‍ ജംഗ്ഷനില്‍ വെള്ളക്കെട്ട് രൂപപ്പെട്ടതിനെ തുടര്‍ന്ന് കടകളിലേക്കു വെള്ളം കയറി. തൃപ്പൂണിത്തുറയില്‍ വീടുകളില്‍ വെള്ളം കയറിയതോടെ ആളുകളെ ഒഴിപ്പിച്ചു. കൊയിലാണ്ടി ദേശീയപാതയില്‍ മരം വീണു ഗതാഗതം തടസപ്പെട്ടു.

തിരുവനന്തപുരം | സംസ്ഥാനത്ത് വരും ദിവസങ്ങളിലും കനത്ത മഴ തുടരും. സംസ്ഥാനത്തിന്റെ വിവിധ ഭാഗങ്ങളില്‍ ശക്തമായ മഴ തുടരുകയാണ്. എറണാകുളം ജില്ലയിലെ വിവിധ ഭാഗങ്ങളില്‍ വെള്ളക്കെട്ട് രൂപപ്പെട്ടതിനെ തുടര്‍ന്ന് പരിസരവാസികളെ സുരക്ഷിത സ്ഥാനങ്ങളിലേക്കു മാറ്റി.

കേരളത്തിനു മുകളിലും സമീപത്തുമായി രൂപപ്പെട്ടിരിക്കുന്ന ചക്രവാതച്ചുഴിയും വടക്കന്‍ കേരളം മുതല്‍ വിദര്‍ഭവരെ ന്യൂനമര്‍ദ പാത്തിയും നിലനില്‍ക്കുന്നതിന്റെ ഫലമാണിത്. മഴയ്‌ക്കൊപ്പം ശക്തമായ കാറ്റിനും മിന്നലിനും സാധ്യതയുണ്ട്. കഴിഞ്ഞ ദിവസങ്ങളില്‍ വലിയ അളവില്‍ മഴ ലഭിച്ച പ്രദേശങ്ങളില്‍ അതുതുടരുന്നതിനാല്‍ താഴ്്ന്ന പ്രദേശങ്ങള്‍, നദീതീരങ്ങള്‍, ഉരുള്‍പൊട്ടല്‍ മണ്ണിടിച്ചില്‍ സാധ്യതയുള്ള് മലലോര പ്രദേശങ്ങള്‍ എന്നിവിടങ്ങളില്‍ താമസിക്കുന്നവര്‍ അതീവ ജാഗ്രത പാലിക്കണമെന്നു ദുരന്തനിവാരണ അതോറിട്ടി അറിയിച്ചു. 21 വരെ കടല്‍ പ്രക്ഷുബ്ധമാകാന്‍ സാധ്യതയുള്ളതിനാല്‍, തീരദേശങ്ങളിലുള്ളവര്‍ ജാഗ്രത പാലിക്കണം. കേരള ലക്ഷദ്വീപ് തീരങ്ങളില്‍ മത്സ്യബന്ധനത്തിനു പോകുന്നതു വിലക്കിയിട്ടുണ്ട്.

കെ.എസ്.ആര്‍.ടി.സി. 700 പുതിയ സിഎന്‍ജി ബസുകള്‍ വാങ്ങും, കൈകാര്യം ചെയ്യുക സ്വിഫ്റ്റ്

May 18, 2022

തിരുവനന്തപുരം | എഴുന്നൂറു പുതിയ സി.എന്‍.ജി. ബസുകള്‍ വാങ്ങാന്‍ കെ.എസ്.ആര്‍.ടി.സി. തീരുമാനിച്ചു. 455 കോടി രൂപ മുതല്‍ മുടക്കിയാണ് ബസുകള്‍ വാങ്ങുന്നത്. കിഫ്ബിയില്‍ നിന്നു നാലു ശതമാനം വായ്പയ്ക്കാണ് പണം ലഭ്യമാക്കുന്നത്. സിഫ്റ്റിനു വേണ്ടിയാണ് ബസുകള്‍ വാങ്ങുന്നത്. നിലവില്‍ കെ.എസ്.ആര്‍.ടി.സിയുടെ ഭാഗമായ 700 ഫാസ്റ്റ് പാസഞ്ചര്‍ ബസുകളുടെ റൂട്ടാണ് ഇതിലൂടെ സ്വിഫ്റ്റിന്റെ കീഴിലാകുന്നത്.

എല്‍.ഡി.എഫിന്റെ സീറ്റെണ്ണം വര്‍ദ്ധിച്ചു, നഷ്ടം യു.ഡി.എഫിന്, തൃപ്പൂണിത്തറയില്‍ ബി.ജെ.പിയുടെ അട്ടിമറി

May 18, 2022

തിരുവനന്തപുരം | തദ്ദേശ സ്ഥാപനങ്ങളിലേക്കു നടന്ന ഉപതെരഞ്ഞെടുപ്പുകളില്‍ ഇടതു മുന്നണിക്കു മുന്നേറ്റം. എല്‍.ഡി.എഫ്. 24 ഇടത്തും യു.ഡി.എഫ് 12 ഇടത്തും ബി.ജെ.പി ആറിടത്തും വിജയിച്ചു. തെരഞ്ഞെടുപ്പിനു മുന്നേയുള്ള കണക്കു പ്രകാരം എല്‍.ഡി.എഫ് 19, യു.ഡി.എഫ് 16, ബി.ജെ.പി 7 എന്നിങ്ങനെയായിരുന്നു കണക്കുകള്‍.

ഒമ്പതു വാര്‍ഡുകളാണ് എല്‍ഡിഎഫ് പിടിച്ചെടുത്തത്. ഇതില്‍ 7 എണ്ണം യുഡിഎഫില്‍നിന്നും രണ്ടെണ്ണം ബിജെപിയില്‍ നിന്നുമാണ്. 3 എല്‍ഡിഎഫ് വാര്‍ഡുകളില്‍ യുഡിഎഫും, രണ്ടിടത്ത് ബിജെപിയും ജയിച്ചു. തൃപ്പൂണിത്തുറ നഗരസഭയിലെ സിറ്റിംഗ് സീറ്റുകളില്‍ പരാജയപ്പെട്ടതോടെ എല്‍.ഡി.എഫിനു കേവല ഭൂരിപക്ഷം നഷ്ടമായി.

കൊല്ലം പെരിനാട് പഞ്ചായത്തിലെ നാന്തിരിക്കല്‍, ശൂരനാട് വടക്ക് പഞ്ചായത്തിലെ സംഗമം, പത്തനംതിട്ട റാന്നി അങ്ങാടി പഞ്ചായത്തിലെ ഈട്ടിച്ചുവട്, ഇടുക്കി ഉടുമ്പന്നൂര്‍ പഞ്ചായത്തിലെ വെള്ളന്താനം, എറണാകുളം കുന്നത്തുനാട് പഞ്ചായത്തിലെ വെമ്പിള്ളി, തശൂര്‍ തൃക്കൂര്‍ പഞ്ചായത്തിലെ ആലങ്ങോട്, മലപ്പുറം വള്ളികുന്ന് പഞ്ചായത്തിലെ പരുത്തിക്കാട് എന്നീ വാര്‍ഡുകളാണ് യുഡിഎഫില്‍ നിന്നും എല്‍ഡിഎഫ് പിടിച്ചെടുത്തത്. കൊല്ലം ആര്യങ്കാവ് പഞ്ചായത്തിലെ കഴുതുരുട്ടി, പാലക്കാട് പല്ലശ്ശന പഞ്ചായത്തിലെ കുടല്ലൂര്‍ വാര്‍ഡുകളാണ് ബിജെപിയില്‍ നിന്ന് പിടിച്ചത്.

ദശാബ്ദം അവസാനത്തോടെ രാജ്യത്ത് 6 ജി, പ്രവര്‍ത്തനം തുടങ്ങിയെന്നു പ്രധാനമന്ത്രി

May 17, 2022

ന്യൂഡല്‍ഹി | ഈ ദശകത്തിന്റെ അവസാനത്തോടെ രാജ്യത്തു അള്‍ട്രാ ഹൈ സ്പീഡ് ഇന്റര്‍നെറ്റ് കണക്ടിവിറ്റി ലഭ്യമാക്കുന്ന 6 ജി ടെലികോം നെറ്റ് വര്‍ക്ക് യാഥാര്‍ഥ്യമാകുമെന്നു പ്രധാനമന്ത്രി നരേന്ദ്ര മോദി. 6 ജി യാഥാര്‍ഥ്യമാക്കാനുള്ള ശ്രമങ്ങള്‍ ഒരു ടാസ്‌ക് ഫോഴ്സിന്റെ നേതൃത്വത്തില്‍ ആരംഭിച്ചതായി ടെലികോം റെഗുലേറ്ററി അതോറിറ്റി (ടി.ആര്‍.എ.ഐ.) യുടെ രജതജൂബിലി ആഘോഷവേളയില്‍ അദ്ദേഹം പറഞ്ഞു.

മാസങ്ങള്‍ക്കുള്ളില്‍ യാഥാര്‍ത്ഥ്യമാകുന്ന 5 ജി നെറ്റ് വര്‍ക്കിലൂടെ 450 ബില്യന്‍ ഡോളര്‍ ഇന്ത്യന്‍ സമ്പദ്വ്യവസ്ഥയിലേക്ക് വന്നുചേരും. നിലവില്‍ 3 ജി, 4 ജി ടെലികോം നെറ്റ് വര്‍ക്കുകളാണ് രാജ്യത്തുള്ളത്. 5 ജി ഇന്റര്‍നെറ്റിന്റെ വേഗത വര്‍ധിപ്പിക്കല്‍ മാത്രമല്ല. വികസനത്തിന്റെ വേഗത വര്‍ധിപ്പിക്കലും തൊഴില്‍ അവസരങ്ങള്‍ സൃഷ്ടിക്കലുമാണ്. 5 ജി ടെക്നോളജി രാജ്യത്തിന്റെ ഭരണനിര്‍വഹണത്തില്‍ ശുഭാത്മക മാറ്റങ്ങള്‍ കൊണ്ടുവരും. കൃഷി, ആരോഗ്യം, വിദ്യാഭ്യാസം, അടിസ്ഥാനസൗകര്യം- ചരക്കുനീക്കം തുടങ്ങിയ മേഖലകളിലെ വളര്‍ച്ചയ്ക്കും ഇത് സഹായകമാകുമെന്നും പ്രധാനമന്ത്രി പറഞ്ഞു.

ശിവലിംഗം കണ്ടെത്തിയെന്നു പറയുന്ന സ്ഥലം സംരക്ഷിക്കണം, നിസ്‌കാരം തടയരുതെന്ന് സുപ്രീം കോടതി നിര്‍ദേശം

May 17, 2022

ന്യൂഡല്‍ഹി | ഗ്യാന്‍വാപി പള്ളിയില്‍ ശിവലിംഗം കണ്ടെത്തിയെന്നു പറയപ്പെടുന്ന സ്ഥലം സംരക്ഷിണമെന്നു ജില്ലാ മജിസ്‌ട്രേറ്റിനു സുപ്രീം കോടതി നിര്‍ദേശം. എന്നാല്‍ പള്ളിയില്‍ നിയന്ത്രണമേര്‍പ്പെടുത്തി, മുസ്ലീം മതവിഭാഗത്തിന്റെ പ്രാര്‍ത്ഥനയ്്ക്കുള്ള അവകാശം തടയാനാവില്ലെന്നും കോടതി പറഞ്ഞു.

അതിനിടെ, കാശി വിശ്വനാഥ ക്ഷേത്രത്തിനോടു ചേര്‍ന്ന ഗ്യാന്‍വാപി മുസ്‌ലിം പള്ളിയിലെ സര്‍വേ നടപടികള്‍ക്ക് നേതൃത്വം നല്‍കിയ അഭിഭാഷക കമ്മിഷണര്‍ അജയ് മിശ്രയെ വാരാണസി ജില്ലാ കോടതി നീക്കി. സര്‍വേ വിവരങ്ങള്‍ മാധ്യമങ്ങള്‍ക്കു ചോര്‍ത്തിയെന്ന ആരോപണത്തെ തുടര്‍ന്നാണ് നടപടി.

ഗ്യാന്‍വാപി പള്ളിയില്‍ നടന്ന വീഡിയോ സര്‍വേ തിങ്കളാഴ്ച പൂര്‍ത്തിയായിരുന്നു. സര്‍വേ വിവരങ്ങള്‍ കോഡീകരിച്ചു കോടതിയില്‍ റിപ്പോര്‍ട്ടു സമര്‍പ്പിക്കാന്‍ കൂടുതല്‍ സമയം വേണമെന്നു അഭിഭാഷക കമ്മിഷന്റെ ആവശ്യം അംഗീകരിച്ച കോടതി രണ്ടു ദിവസം കുടി അനുവദിച്ചു. അജയ് മിശ്രയ്ക്കു പകരം സ്‌പെഷല്‍ കമ്മിഷണര്‍ വിശാല്‍ സിംഗാവും റിപ്പോര്‍ക്ക് സമര്‍പ്പിക്കുക. സര്‍വേയ്ക്കിടെ ശിവലിംഗം കണ്ടെത്തിയെന്നു പറയപ്പെടുന്ന കുളം സീല്‍ ചെയ്യാന്‍ കഴിഞ്ഞ ദിവസം വാരണാസി സിവില്‍ കോടതി ഉത്തരവിട്ടിരുന്നു. സീല്‍ ചെയ്ത പ്രദേശം സുരക്ഷാ കേന്ദ്രസേനയ്ക്കു കൈമാറുകയും ചെയ്തു.

കുന്ദകുളം മാപ്പു തേടിയിറങ്ങി പി.വി. ശ്രീനിജന്‍, തൃക്കാക്കരയുടേതുണ്ടെന്ന് സാബു, തൃക്കാക്കരയില്‍ ട്വന്റി20 വോട്ട് ആര്‍ക്കു കിട്ടും ?

May 16, 2022

കൊച്ചി | ഒരാള്‍ക്കു കൊടുക്കാനായി ‘കുന്ദകുളം മാപ്പ്’ തേടിയിറങ്ങിയ പി.വി. ശ്രീനിജന്‍ എം.എല്‍.എയുടെ ഫേസ്ബുക്ക് പോസ്റ്റ് വന്നതിനേക്കാള്‍ വേഗത്തില്‍ തിരികെപോയി.

തൃക്കാക്കരയില്‍ സ്വാനാര്‍ത്ഥിയില്ലാത്ത ട്വന്റി 20യുടെ വോട്ട് ആര്‍ക്കാണെന്ന് ഇതുവരെയും പ്രഖ്യാപിച്ചിട്ടില്ല. ഇക്കാര്യത്തില്‍ ആംആദ്മിയും ട്വന്റി20യും ഏകദേശ ധാരണയിലെത്തിയിട്ടുണ്ടെന്നാണ് പുറത്തുവരുന്ന വിവരം. ഈ വോട്ടു പൂര്‍ണ്ണമായോ ഭാഗികമായോ ലഭിക്കുമെന്ന പ്രതീക്ഷയിലാണ് ഇരു മുന്നണികളും. ഉപതെരഞ്ഞെടുപ്പില്‍ ട്വന്റി20യോട് വോട്ടുതേടും മുന്നേ പി.വി. ശ്രീനിജന്‍ ഉള്‍പ്പെടെയുള്ളവര്‍ മാപ്പു പറയണമെന്നു സാബു എം. ജേക്കബ് കഴിഞ്ഞ ദിവസം പറഞ്ഞിരുന്നു. അതിനുള്ള മറുപടിയെന്നോണമാണ് ശ്രീനിജന്റെ പ്രതികരണം ഉണ്ടായിരിക്കുന്നത്. തൃക്കാക്കരയുടെ മാപ്പ് കൈവശമുണ്ടെന്നു സാബു എം. ജേക്കബുകൂടി പ്രതികരിച്ചതോടെയാണ് ശ്രീനിജന്‍ പോസ്റ്റ് പിന്‍വലിച്ചത്.

ശക്തമായ പോരാട്ടം നടക്കുന്ന തൃക്കാക്കരിയില്‍ ട്വന്റി 20 യുടെ വോട്ടില്‍ കണ്ണുംനട്ടിരുന്ന സി.പി.എം നേതാക്കളെ വെട്ടിലാക്കിയാണ് ശ്രീനിജന്‍ ഫേസ്ബുക്കില്‍ പോസ്റ്റിയത്. ജനക്ഷേമ സഖ്യം മുന്നോട്ടുവച്ച നിലപാട് ഇടതുപക്ഷത്തിന്റേതെന്നു സി.പി.എം സംസ്ഥാന സെക്രട്ടറിയേറ്റ് അംഗം എം. സ്വരാജ് പറഞ്ഞിരുന്നു.

കെ റെയിലില്‍ കല്ലിടല്‍ നിര്‍ത്തി, സാമൂഹകാഘാത പഠനം ജി.പി.എസ് സംവിധാനത്തിലൂടെ നടത്തും

May 16, 2022

തിരുവനന്തപുരം | കെ റെയിലിന്റെ സാമൂഹികാഘാത പഠനം ജി.പി.എസ്് സംവിധാനത്തിലൂടെ തുടരും. ഇതുസംബന്ധിച്ച ഉത്തരവ് റവന്യൂ വകുപ്പ് പുറത്തിറക്കി. തൃക്കാക്കര ഉപതെരഞ്ഞെടുപ്പിനു ദിവസങ്ങള്‍ മാത്രം നിലനില്‍ക്കേയാണ് സര്‍ക്കാരിന്റെ തിരുത്തല്‍ നടപടി. സാമൂഹികാഘാത പഠനത്തിനു നേരെയുള്ള പ്രതിഷേധങ്ങള്‍ താല്‍ക്കാലികമായെങ്കിലും ഒഴിവാക്കാന്‍ സര്‍ക്കാരിന് ഇതിലൂടെ സാധിക്കും.

കല്ലിടല്‍ പുരോഗമിച്ചപ്പോള്‍ സംസ്ഥാനത്തു അരങ്ങേറിയ സംഘര്‍ഷങ്ങള്‍ കൂടി കണക്കിലെടുത്താണ് ജിപിഎസ് സര്‍വേ നടത്താനുള്ള തീരുമാനത്തിലേക്ക് സര്‍ക്കാര്‍ എത്തിയത്. കല്ലിടലിനെതിരേയുള്ള കടുത്ത പ്രതിഷേധം മറികടക്കാനുള്ള നിര്‍ണായക നീക്കം കൂടിയാണിത്. കല്ലിടലിലുണ്ടാകുന്ന പ്രതിഷേധങ്ങളെ മറികടക്കാന്‍ പോലീസ് സംവിധാനത്തിലൂടെ സാധിക്കുന്നില്ലെന്നും ബദല്‍ സംവിധാനങ്ങളെക്കുറിച്ച് ആലോചിക്കണമെന്നും കെ റെയില്‍ ആവശ്യപ്പെട്ടിരുന്നു.